ކުށެއް ކުރުމުން ތަޅާ އަނިޔާކުރުން ގޯސް: މިނިސްޓަރ މަޙްލޫފް
މީހަކު ކުށެއް ކުރުމުން އެމީހަކު އޮރިޔާންކޮށް އަނިޔާކުރުން ގޯސް ކަމަަށް ޔޫތު މިނިސްޓަރ އަހުމަދު މަޙްލޫފް ވިދާޅުވެއްޖެއެވެ.
ޔޫތު މިނިސްޓަރ މިހެން ވިދާޅުވީ ދޯންޏަކަށް އެރި މީހަކު ބޮކްސާކޮޅަށް ހަދާލައި ބަނދެ ވަރަށް ރަޙުމްކުޑަކޮށް ތަޅާ އަނިޔާ ކުރާ މަންޒަރު ފެންނަ ވީޑިއޯއެއް މީސް މީޑިއާގައި ދައުރުވަމުން ދިޔުމާ ގުޅިގެންނެވެ.
ދައުރުވި ވީޑިއޯއިން ފެންނަ ގޮތުގައި ދޯންޏަށް އެރިމީހާ އަތުލައިގަތް މީހުން ވަނީ، އެމީހާ ބޮކްސާ ކޮޅަށް ހަދާލައި އަތާއި ފައި ބަނދެފައެވެ. އަދި އެމީހާ ވަށައިގެން ގިނަ އަދަދެއްގެ މީހުން ތިބި މަންޒަރު ވެސް ވީޑިއޯއިން ފެނެއެވެ. އެމީހުން އޭނާގައިގައި ފައިންނާއި ލަޓިބުރި ފަދަ އެއްޗެހި ބޭނުން ކޮށްގެން ތަޅާ އަނިޔާ ކުރާ މަންޒަރު ވެސް ފެނެއެވެ.
އެދޯނިން ނެގި ލާރިތަކާއި ފޯނުތައް ކޮބައިތޯ އަހާ، އަޑުގަދަކޮށް އެމީހުން އޭނާއާ ސުވާލު ކޮށްފައިވެއެވެ.
މިކަމާއިމެދު މަޙްލޫފް މިއަދު ކުރެެއްވި ޓްވީޓެއްގައި ވިދާޅުވެފައިވަނީ ޖުމްލަކޮށް ކޮންމެ ދިވެހި އާއިލާއެއްގައި މަސްތުވާތަކެތީގެ ވަބާގައި ޖެހިފައިވާ ދަރިން އެބަތިބި ކަމަށާއި މިއީ ގިނަ ފަހަރު އާއިލާއަށް ވެސް އަދި މުޖުތަމަޢަށްވެސް އުނދަގޫ މައްސަލައެއް ކަމަށެވެ.
"ނަމަވެސް އެމީހުން ކުށެއް ކުރީމަ އޮރިޔާންކޮށް ތަޅާ އަނިޔާކުރުން ކަނޑައެޅިގެން ގޯސް" މަޙްލޫފް ވިދާޅުވެފައިވެއެވެ.
ރާއްޖޭގައި ވައްކަން ކުރާ މީހުންނަަށް މިފަދައިން ވަރަށް ގިނައިން އަނިޔާކޮށް، ވީޑިއޯ ހަދާފައި ފަލީޙަތް ކޮށްފައިވެއެވެ.
Ads by STO
