ކޮވިޑް-19: ބަލީގެ ވޭން އިތުރަށް ތަހައްމަލު ކުރުމަށްވުރެ މަރުވުން މާ ރަނގަޅުވާނެ ކަމަށްބުނެ ޑޮކްޓަރަކު ބަލި 2 މީހުން މަރާލައިފި
ކޮވިޑް 19 އަށް ފަރުވާ ހޯދަމުން ދިޔަ ދެ މީހަކު މަރާލި ކަމުގެ ތުހުމަތުގައި ޖަރުމަނުގެ ޑޮކްޓަރެއް ހައްޔަރު ކޮށްފިއެވެ.
ޑޮކްޓަރުގެ އަތްދަށުވެ ، މަރުވި 47 އަހަރާއި 50 އަހަރުގެ މި ދެ މީހުންނަކީ ހާލު ދެރަވެގެން އައިސީޔޫގައި ފަރުވާ ދެމުން ދިޔަ ދެ މީހުންނެވެ.
ޖަރުމަނުގެ ފުލުހުން ހާމަކުރާ ގޮތުގައި މި ޑޮކްޓަރ ހައްޔަރުކޮށްފައި ވަނީ އިންޖެކްޝަން ބޭނުންކޮށްގެން ކުއްލި ހާލަތުގައި ކޮވިޑް 19 އަށް ފަރުވާ ދެމުން ދިޔަ ބަލި ދެ މީހުން މަރާލި ކަމުގެ ތުހުމަތު ކުރެވޭތީއެވެ.
އުމުރުން 44 އަހަރުގެ މި ޑޮކްޓަރަކީ ޖަރުމަނުގެ ޔުނިވާސިޓީ ހޮސްޕިޓަލް އިން އެސެން ގައި މި އަހަރުގެ ފެބްރުއަރީ މަހުން ފެށިގެން މަސައްކަތް ކުރަމުން އަންނަ ޑޮކްޓަރެއް ކަމަށް ބޭރުގެ މީޑީއާ ތަކުން ރިޕޯޓް ކުރެއެވެ.
މިދިޔަ ބުދަ ދުވަހު އޭނާ ހައްޔަރުކޮށްފައި ވާއިރު އެކަކު މަރާލި ކަމަަށް އޭނާ ވަނީ އެއްބަސްވެފައެވެ. އަދި އެ ޑޮކްޓަރު ބުނިގޮތުގައި ބަލިމީހާ މަރާލީ އިތުރަށް އެ ވޭން ތަހައްމަލް ކުރުމަށް ވުރެ މަރުވުން މާ ރަނގަޅު ވާނެތީ ކަމަށެވެ. އަދި އެ ވޭނުގައި ބަލިމީހާ އުޅޭތަން ދެކެން އާއިލާއަށް ކެތް ނުވާނެތީ ހިތާމަ ލުއި ކުރަން ކަމަށެވެ. މީގެ އިތުރުން އެ ޑޮކްޓަރު ބުނެފައި ވަނީ އިންޖެކްޝަން ބޭނުންކޮށްގެން ބަލިމީހާ މަރާލުމުގެ ކުރިން އާއިލާ އަށް އެކަން އަންގާފައިވާނެ ކަމަށެވެ. ޖަރުމަނުގެ ގަވާއިދުގައިވާ ގޮތުން ބަލިމީހާ އާއި އާއިލާގެ ހުއްދައާއެކު ބަލި މީހާ އަށް އިތުރު ތަކްލީފް ނުޖެއްސުމަށް އިންޖެކްޝަންގެ އެހީގައި މަރާލެވޭނެ އެވެ.
ނަމަވެސް މި ހާދިސާ ގައި ބަލިމީހާ އާއި އާއިލާގެ ހުއްދަ ލިބުނުކަން ސާފުވެފައެއް ނެތެވެ. އެހެންކަމުން މި މައްސަލަ މިހާރު ދަނީ ތަހުގީގު ކުރަމުންނެވެ. މަރުގެ މައްސަލަ ތަކަކީ ޖަރުމަނުގައި ޚާއްޞަ އަހައްމިއްޔަތުކަމެއް ދީގެން ތަހުގީގު ކުރާ މައްސަލަތަކެކެވެ.
ޔުނިވާސިޓީ ހޮސްޕިޓަލް އިން އެސެން އިން މައުލޫމާތު ދޭ ގޮތުގައި އެ ޑޮކްޓަރު ވަނީ މި މައްސަލައާއި ގުޅިގެން ސަސްޕެންޑް ކުރެވިފައެވެ. އަދި ތަހުޤީޤަށް ބޭނުންވާ އެއްބާރުލުން ފުރިހަމައަށް ދޭނެ ކަމަށް އެ ހޮސްޕިޓަލް އިން ވަނީ ބުނެފައެވެ.
Ads by STO
