މެރެޑޯނާގެ މަރު: ޑޮކްޓަރަށް ބޮޑު ތުހުމަތެއް ކޮށް ގެ ބަލައި ފާސްކޮށްފި
މިދިޔަ ހަފްތާގައި މުޅި ދުނިޔެ ސިއްސުވާލި އެއް ހަބަރަކީ ދުނިޔޭގެ ތާރީހުގައި ވެސް މިހާތަނަށް އުފެދުނު އެންމެ މޮޅު އެއް ފުޓުބޯޅަ ކުޅުންތެރިޔާ ޑިއޭގޯ މެރެޑޯނާގެ މަރުގެ ހަބަރެވެ. އެހަަބަރާއެކު ފުޓުބޯޅައަށް ލޯބިކުރާ އެތައް ބަޔަކަށް ހިތްދަތިކަން ގެނުވިއެވެ.
މީޑިއާތަކުން ރިޕޯޓްކޮށްފައިވާ ގޮތުގައި މެރެޑޯނާ މަރުވީ ހާރޓް އެޓޭކެއް ޖެހިގެންނެވެ. އަދި ހާރޓް އެޓޭކް ޖެހުނީ ސިކުނޑީގައިވާ ގަނޑު ލޭ ކޮޅެއް ނެގުމަށް ކުރެވުނު އޮޕަރޭޝަން ކާމިޔާބުވެ ގޭގައި ހުއްޓައެވެ.
މިއަދު ނޫސްތަކުގެ ފަލަ ސުރުހީގައި އޮތް ވާހަކަ އަކީ މެރެޑޯނާގެ ޑޮކްޓަރަށް ބޮޑެތި ތުހުމަތު ތަކެއް ކުރެވިފައިވާ ކަމަށާއި މެރެޑޯނާގެ މަރާއި ގުޅިގެން އޭނާގެ ޑޮކްޓަރުގެ ގެ ބަލާ ފާސްކޮށް ތަހުގީގު ކުރިއަށް އެބަ ދާ ކަމަށެވެ.
އާޖެންޓީނާގެ މީޑިއާއެއް ކަމަށްވާ ކްލެރިންގައި ބުނެފައިވަނީ އާދީއްތަ ދުވަހު ފުލުހުން ވަނީ މެރެޑޯނާގެ ޑޮކްޓަރުގެ ގެ ބަލާ ފާސްކޮށްފަ ކަމަށެވެ. ލޫކް ނަމަކަށް ކިޔާ މި ޑޮކްޓަރަކީ މެރެޑޯނާގެ ޕްރައިވެޓް ޑޮކްޓަރެވެ. މަރު ދުވަހާ ޖެހެންދެން ވެސް މެރެޑޯނާ އަށް ފަރުވާ ދިނީ އޭނާއެވެ.
މެރެޑޯނާގެ ޑޮކްޓަރަށް ކޮށްފައިވާ ތުހުމަތަކީ އެހީއަށް ބޭނުންވެފައިވާ ބަލިމީހަކާ ދޭތެރޭ އިހްމާލުވުމުގެ ތުހުމަތެވެ. މި ދައުވާ އޭނާގެ މައްޗަށް ސާބިތު ވެއްޖެ ނަމަ 2 އަހަރާއި 6 އަހަރާ ދެމެދުގެ ޖަލު ހުކުމެއް އޭނާއަށް އިއްވޭނެއެވެ.
މިއަދު އޭނާގެ ގެ ބަލައި ފާސްކުރެވިފައިވާއިރު ތިރީހަށްވުރެ ގިނަ ފުލުހުން މި އޮޕަރޭޝަންގައި ބައިވެރިވި ކަމަށް ބޭރުގެ މީޑިއާތަކުން ރިޕޯޓް ކުރެއެވެ
