އުސޫލާ ޚިލާފަށް ތުއްތު ކުދިންގެ ކާނާ ވިއްކާތީ ފިޔަވަޅު އަޅަނީ!
ތުއްތުކުދިންނަށް ދޭ ކާނާގެ ބާވަތްތަކުގެ ތެރެއިން ރަޖިސްޓްރީ ކޮށްގެން އިންޕޯޓުކުރާ އުފެއްދުންތައް ރަޖިސްޓްރީކުރި ޝަރުތާ ހިލާފަށް ބައެއް ފަރާތްތަކުން ވިއްކަމުންދާކަން ފާހަގަކުރެވިފައިވާ ކަމަށް މޯލްޑިވްސް ފުޑް އެންޑް ޑްރަގް އޮތޯރިޓީ(އެމްއެފްއެންޑީއޭ) އިން ބުނެފި އެވެ.
އެމްއެފްއެންޑީއޭ އިން ބުނީ ރަޖިސްޓްރީ ކޮށްގެން އިންޕޯޓުކުރާ އުފެއްދުންތައް ރަޖިސްޓްރީކުރި ޝަރުތާ ހިލާފަށް ފޯރުކޮށްދިނުމާއި، ވިއްކުމާއި އަދި ވިއްކަން ބަހައްޓާކަން އެ އޮތޯރިޓީގެ އިންސްޕެކްޝަންތަކުން ފާހަގަކުރެވިފައިވާ ކަމަށެވެ.
މީގެއިތުރުން ރެޖިސްޓްރީ ނުކުރާ އުފެއްދުންތައް ވިއްކަން ބަހައްޓާކަން ފާހަގަ ކުރެވިފައިވާ ކަމަށް ވެސް އެމްއެފްއެންޑީއޭ އިން ބުނެފައިވެއެވެ.
ގަވާއިދާ އެއްގޮތަށް ރަޖިސްޓްރީކޮށް އަދި އުފެއްދުންތައް ރަޖިސްޓްރީ ކުރި ޝަރުތާ އެއްގޮތަށް ފޯރުކޮށްދިނުމާއި، ވިއްކުމާއި އަދި ވިއްކަން ބެހެއްޓުމަށް އެއޮތޯރިޓީން އަންގާފައިވެއެވެ.
މީގެއިތުރުން މިހާރު ރަޖިސްޓްރީކޮށްގެން ވިއްކަން ބަހައްޓާފައިވާ އުފެއްދުންތަކުގެ ލޭބަލް ޑިސެމްބަރު 31 ވާ ބުރާސްފަތި ދުވަހާ ހަމައަށް އެއޮތޯރިޓީން ފާސްކޮށްފައިވާ ލޭބަލް އާއި އެއްގޮތަށް އިސްލާހުކުރުމަށް ވެސް އެމްއެފްއެންޑީއޭ އިން އަންގާފައިވެއެވެ. އެ ތާރީހުގެ ފަހުން ގަވާއިދާ ހިލާފަށް ލޭބަލްކޮށްފައިވާ އުފެއްދުންތައް ވިއްކަން ބެހެއްޓުމަކީ މަނާ ކަމެއްގެ ގޮތުގައި ވެސް އެއޮތޯރިޓީން ވަނީ ކަނޑައަޅާފައެވެ.
އެމްއެފްއެންޑީއޭ އިން ބުނީ އެގޮތަށް އަމަލު ނުކުރާ ފަރާތްތަކާއި މެދު ގަވާއިދުގެ ދަށުން ފިޔަވަޅު އަޅާނެ ކަމަށެވެ.
