ސޯލިޙު ފިރިހެނަކަށް ލިބުނު ތަޤްވާވެރި އަނތްބެއްގެ ވާހަކަ!
ޠާބިތު ބިން ނަމަން އޭ ކިޔުނު ސައުދީ އަރަބިއާގެ މީހަކަށް ދިމާވި ހާދިސާއެއްގެ ވާހަކައެވެ.
ދިގު ދަތުރެއްގައި، ހިނގާފައި ދަނިކޮށް އޭނާ ވަރަށް ބޮޑަށް ބަނޑުހައިވެ ވަރުބަލިވިއެވެ. ކުރިމަތިން ކޯރެއްގެ ކައިރިން ފެނުނީ މޭވާ އަޅާ ފުރިފައިވާ ބަގީޗާއަކާއި އެބަގީޗާ ކައިރީގައި އޮތް ކޯރެކެވެ.
ބަނޑުހައި ވެފައިވީވަރުން ޠާބިތުގެ ބަނޑުން ހުރީ އަޑު ކިޔާލަ ކިޔާލައެވެ. އެހެންކަމުން ކުރިމަތިން ފެންނަމުން ދިޔަ ބަގީޗާގައި އަޅާފައިހުރި މޭވާތަކަށް ބަލަން ހުރެ، ބަނޑުހައި ހޫނު ކަމަށް ކެތް ނުވެގެން އެތަނުން އާފަލު ގަހަކުން އާފަލެއް ބިނެވެ.
އާފަލުގެ އެއްބައި ކެއުމަށްފަހު ކޯރުން ފެން ބޮއެފައި، ކުއްލިއަކަށް އޭނާއަށް ކުރެވުނު ކަންތަކާމެދު ވިސްނާލިއެވެ. އޭނާ އެ އާފަލު ކެއީ ބަނޑުހައި ހޫނުކަމަށް ކެތް ނުކުރެވިގެން ކަމުގައިވީ ނަމަވެސް، އެހެން މީހެއް ހައްދާފައި ހުރި މޭވާ ގަހަކުން، އެމީހާގެ ހުއްދަ ނުހޯދާ މޭވާ ކެވުނީތީ އެކަމާ ވަރަށް ދެރަވެ އަމިއްލަ ނަފްސުގެ މައްޗަށް ލަދުގަތެވެ. އަދި އޭނާގެ ހިތަށް އެރިއެވެ.
"އަހަންނަށް ހަލާކު ހުއްޓެވެ. އެހެން މީހެއްގެ މޭވާއެއް، އެމީހެއްގެ ހުއްދައަކާ ނުލާ އަހަރެން ކެއީ ކީއްވެ ހެއްޔެވެ؟ އަހަރެން މިތަނުން ދާނީ އެބަގީޗާގެ ވެރިމީހަކު ހޯދާ، އޭނާ ގާތުން މާފަށް އެދުމަށް ފަހުއެވެ."
ވަރަށް ބުރަ މަސައްކަތަށްފަހު، ޠާބިތު އަށް އެބަގީޗާގެ ވެރިމީހާ އުޅޭ ގެ ހޯދުނެވެ. ދޮރުގައި ޓަކި ޖެހުމުން، އެމީހާ ދޮރު ހުޅުވިއެވެ. އަދި ބޭނުން ވަނީ ކޮންކަމެއްތޯ ޠާބިތު ކައިރިން އެއްސެވެ.
ޠާބިތު ބިން ނަމަން ބުންޏެވެ.
"ކޯރު ކައިރީގައި ކަލޭ ހައްދާފައިވާ ބަގީޗާއިން ކަލޭގެ ހުއްދައަކާ ނުލާ، އަހަރެން އާފަލެއް ބިނދެ އޭގެން އެއްފަޅި ކައިފީމެވެ. އެ އާފަލަކީ އަހަރެންގެ އެއްޗެއް ނޫންކަން އަހަންނަށް ހަނދާންވީ އޭގެން އެއްފަޅި ކެއި ފަހުންނެވެ. ކަލޭގެ ހުއްދައެއް ނެތި ކަލޭގެ ބަގީޗާއިން މޭވާއެއް ބިނދެގެން ކެވުނީތީ އަހަންނަށް މާފު ކޮށްދޭށެވެ."
އެމީހާ ބުންޏެވެ.
"އަހަރެން ކަލެއަށް މާފު ކުރާނީ ޝަރުތެއްގެ މަތިންނެވެ." އެއީ ކޮން ޝަރުތެއްތޯ ޠާބިތު އެހުމުން އެމީހާ ބުނީ "އެއީ އަހަރެންގެ އަންހެން ދަރިފުޅާ ކަލޭ ކައިވެނި ކުރުމެވެ."
"އަހަރެން އޭނާއާ ކައިވެނި ކުރާނަމެވެ." ޠާބިތު ބުންޏެވެ.
އެމީހާ ބުންޏެވެ. "ނަމަވެސް އަހަރެންގެ ދަރިފުޅާ ބެހޭގޮތުން ކަލެއަށް އެނގުން ވަރަށް މުހިންމު ކަންތައްތަކެއް އެބަހުއްޓެވެ. އެއީ އަހަރެންގެ ދަރިފުޅަކީ ލޯފަން ކުއްޖެކެވެ. އަދި އޭނާއަކީ ކަންފަތަށް އަޑު ނުއިވޭ، ވާހަކަ ވެސް ނުދެއްކޭ ކުއްޖެކެވެ."
ކުއްލިއަކަށް އޭނާއަށް ކުރިމަތިވި ހާލަތާމެދު ޠާބިތު ވިސްނާލިއެވެ. އެކަމާމެދު ކުރާނީ ކީއްތޯ އޭނާ ވިސްނާލިއެވެ. ކޮންމެއަކަސް އެކަމާ އިންކާރު ނުކުރުމަށް އޭނާ ނިންމިއެވެ. އެއީ އެފަދަ އަންހެނަކާ ކައިވެނިކޮށް އޭނާގެ ޚިދުމަތުގައި ހުރެ އޭނާ ބެލުމަކީ ޙަރާމް އެއްޗެއް ކައިގެން ނަރަކަވަންތަވެރިއަކަށް ވުމަށް ވުރެ ފައިދާކަން ބޮޑުކަމެއްކަން އޭނާއަށް ވިސްނުމުންނެވެ. އަދި މިދުނިޔޭގެ ދުވަސްތަކަކީ ދާއިމަށް ދެމި އޮންނާނެ ދުވަސްތަކެއް ނޫންކަން ވެސް އޭނާއަށް ވިސްނި ޤަބޫލު ކުރެވުނެވެ.
އެހެންކަމުން މާތް ރަސްކަލާނގެ ރުއްސުން ލިބިގަތުމަށްޓަކައި ބަގީޗާގެ ވެރިމީހާގެ އަންހެން ދަރިފުޅާ ކައިވެނި ކުރުމަށް އޭނާ އެއްބަސްވިއެވެ.
ނަމަވެސް ކައިވެނި ކުރާ ދުވަސް ގާތްވުމުން ޠާބިތު ހާސްވިއެވެ. އިބިލީސް އޭނާގެ ހިތަށް ވަސްވާސްލާ ދެމުން ދިޔައެވެ. "އެމީހެއްގެ ފިރިމީހާ ނުވެސް ފެންނާނެ، ފިރިމީހާގެ އަޑެއް ވެސް ނުއިވޭނެ އަދި ފިރިމީހާއާ ވާހަކަ ވެސް ނުދެއްކޭނެ އަންހެނަކާ އަހަރެން ކައިވެނި ކޮށްގެން ހަމަޖެހޭ ދިރިއުޅުމެއްގައި އުޅޭނީ ކިހިނެއް ހެއްޔެވެ؟" މިފަދަ ޚިޔާލުތަކެއް ހިތަށް ވެރިވުމުން އޭނާ ވަރަށް ބޮޑަށް މާޔޫސްވެ، ކައިވެނި ކުރަން ކަނޑައެޅިފައިވާ ދުވަސް ޖެހުމުގެ ކުރިން މިދުނިޔެއިން ވަކިވެގެން ދާނެ ނަމައޭ ވެސް އޭނާގެ ހިތަށް އެރިއެވެ.
އެފަދަ ޚިޔާލުތަކެއް ހުރިކަމުގައި ވިޔަސް، އޭނާ ގަސްތުކުރީ މާތް ﷲ އަށް ކުއްތަންވެ އެކަލާނގެއަށް ފުރިހަމައަށް އިތުބާރުކޮށް އެކަލާނގެއަށް ވަކީލު ކުރުމަށެވެ.
ކައިވެނި ކުރަން އޮތް ދުވަހު، ޠާބިތުއަށް އެއަންހެން ކުއްޖާ ފުރަތަމަ ފަހަރަށް ފެނުނެވެ. އަންހެން ކުއްޖާގެ ރީތިކަން ފެނިފައި އޭނާ ހަނދާންވީ ޖަންނަތުގައި ތަޤްވާވެރީންނަށް ލިބެން އިރާދަ ކުރައްވާފައިވާ ހޫރުލްއީނުންގެ މަތީންނެވެ.
ކައިވެނި ކުރެވުމުން، އަންހެން ކުއްޖާ އޭނާގެ ކުރިމައްޗަށް އަރާފައި ބުންޏެވެ.
" السَّلاَمُ عَلَيْكُمْ وَرَحْمَةُ اللهِ وَبَرَكَاتُهُ "
ޠާބިތުއަށް ލިބުނީ ވަރަށް ވެސް ބޮޑު ހައިރާން ކަމެކެވެ. އޭނާ ބުންޏެވެ. "وَعَلَيْكُمْ السَّلاَمُ وَرَحْمَةُ اللهِ وَبَرَكَاتُهُ ، މިއީ ކޮންކަމެއް ހެއްޔެވެ؟ ކަނބުލޭގެއަށް ފެނޭ ހެއްޔެވެ؟ ވާހަކަ ދެއްކި އަޑުވެސް އިވޭ ހެއްޔެވެ."
އަންހެން ކުއްޖާގެ ބައްޕަ ބުނި ވާހަކަ ޠާބިތު ކިޔައިދިނެވެ. އަންހެން ކުއްޖާ ބުންޏެވެ.
"އަހަރެންގެ ބައްޕަ އެބުނުއްވީ ތެދެކެވެ. އަހަންނަކީ ވާހަކަ ނުދެއްކޭ މީހެއް ކަމަށް ބައްޕަ އެބުނުއްވީ، އެއީ އަހަންނަކީ ދެއްކުން ނަހީ ކުރައްވާފައިވާ ވާހަކަ ދައްކާ މީހެއް ނޫނެވެ. އަދި އަހަންނަށް ވާހަކަ ދެއްކުން ހަލާލު ފިރިހެނަކާ ނޫނީ މީގެ ކުރިން އަހަރެން ވާހަކަ ދައްކާފައެއް ނުވާނެއެވެ. އަހަންނަކީ ކަންފަތަށް އަޑު ނުއިވޭ މީހެއް ކަމުގައި ބައްޕަ އެބުނުއްވީ، މީސްމީހުންގެ ނެތިމޮށުމާއި ޣީބަ ބުނެއުޅޭ މީހުންނާއެކު އަހަރެން ނުއުޅެމެވެ. އެފަދަ މީހުން ދައްކާ ވާހަކަތައް އަހަންނަކަށް އަޑެއް ނުއިވޭނެއެވެ. އަހަންނަކީ ލޯފަން މީހެއް ކަމަށް ބައްޕަ އެބުނުއްވީ އަހަންނަށް ބެލުން ޙަލާލު ވެގެންވާ ފިރިހެނަކާ ދިމާލަށް ނޫނީ އަހަރެން ދުވަހަކު ވެސް ބަލާފައެއް ނުވާނެއެވެ."
ޠާބިތުއަށް މާތް ރަސްކަލާނގެ ދެއްވި ނިޢުމަތާމެދު ވިސްނާ އުފަލުން ގޮސް އޭނާގެ ދެލޮލުން ކަރުނަ ފޫދުނެވެ. އަދި އެކަލާނގެއަށް ޙަމްދުކޮށް ސަޖިދަ ޖެހިއެވެ.
Ads by STO
