ދިވެހިންނަށް ސްކައިޑައިވް ކުރުމަށް ފުރުޞަތެއް
ދިވެހިންނާއި ރާއްޖެއަށް ޒިޔާރަތްކުރާ ފަތުރުވެރިންނަށް ހާއްސަކޮށް ސްކައިޑައިވް ކުރުމުގެ ޕްރޮގްރާމެއް ފެށުމަށް ތައްޔާރުވެއްޖެއެވެ.
"ޖަންޕިން އިން މޯލްޑިވްސް"ގެ ނަމުގައި ފަށާ މި ޕްރޮގްރާމަކީ މަންޓާ އެއަރ އާއި ސްކައި ޑައިވް މޯލްޑިވްސް އައިލެންޑްސް ޕްރައިވެޓް ލިމިޓެޑް ގުޅިގެން، ސްކައި ޑައިވް ގަތަރާއި ރެއޯލޯ ޓްރެވަލްސް ގެ ބައިވެރިވުން ހިމެނޭހެން ކުރިއަށް ގެންދަން ނިންމާފައިވާ ޕްރޮގްރާމެކެވެ.
މަންޓާ އެއާ ހަވާލާދީ "ޕީއެސްއެމް ނިއުސް" ގައި ރިޕޯޓުކޮށްފައިވާ ގޮތުގައި މި ޙަރަކާތް ކުރިއަށް ގެންދިއުމަށްޓަކައި މަންޓާ އެއަރ އިން ވަނީ "ސެސްނާ 208" މަރުކާގެ މަތިންދާ ބޯޓެއް ރާއްޖެ ގެނެސްފައިވާއިރު، މި ބޯޓު މިހާރު އޮތީ ކުޑަހުވަދޫގައި ތަރައްޤީ ކޮށްފައިވާ ދާލު އެއަރޕޯޓުގައެވެ.
މި ހަރަކާތާއެކު ރާއްޖޭގައި ސްކައި ޑައިވިންގއަށް ޚާއްސަ ޑްރޮޕް ޒޯންތަކެއް ކަނޑައެޅިގެންދާއިރު، ފުރަތަމަ ޑްރޮޕް ޒޯނެއްގެ ގޮތުގައި ކަނޑައަޅާނީ ދާލު އަތޮޅުގެ ސަރަޙައްދެކެވެ.
މި ސްކައި ޑައިވިން ޕްރޮގްރާމުގައި ލައިސަންސް ލިބިފައިވާ ޕްރޮފެޝަނަލް ސްކައި ޑައިވަރުންނަށް ބައިވެރިވެވޭނެއެވެ. އަދި އިންސްޓްރަކްޓަރަކާ އެއްކޮށް ސްކައިޑައިވް ކުރުމުގެ ފުރުސަތު ދިވެހިންނަށާއި ރާއްޖެއަށް ޒިޔާރަތްކުރާ ފަތުރުވެރިންނަށް ލިބިގެންދާނެކަމަށް މަންޓާ އެއަރއިން ބުނެއެވެ.
