ބެންކޮކްގައި ހިނގި އެކްސިޑެންޓުގައި ހާލު ސީރިއަސްވި ދިވެހި މީހާ ނިޔާވެއްޖެ
މިދިޔަ އަހަރުގެ ޑިސެމްބަރު މަހުގެ ތެރޭގައި ތައިލޭންޑްގެ ވެރިރަށް ބެންކޮކްގައި ދިވެހިން ދަތުރުކުރަމުން ދިޔަ ކާރެއް ފުރޮޅާލައި ހިނގި އެކްސިޑެންޓުގައި ހާލު ސީރިއަސް ވެގެން ފަރުވާދެމުން ދިޔަ ދިވެހި މީހާ ނިޔާވެއްޖެއެވެ.
އެ ހާދިސާގައި ނިޔާވެފައި ވަނީ އައްޑޫ ސިޓީ ހުޅުދޫ އަށް ނިސްބަތްވާ އަހްމަދު ސައީދު ނަމަކަށް ކިޔާ މީހެކެވެ.
ފޮރިން މިނިސްޓްރީއާ ހަވާލާދީ "ވަގުތު" ނޫހުން ރިޕޯޓުކޮށްފައިވާ ގޮތުގައި އެ މީހާ ނިޔާވެފައިވާކަމުގެ މައުލޫމާތު ތައިލެންޑްގައި ހުންނަ ދިވެހި އެމްބަސީއަށް ލިބިފައިވާ ކަމަށާއި އެ މީހާގެ އާއިލާއަށް ފޯރުކޮށްދޭން ޖެހޭ އެހީތެރިކަން ފޯރުކޮށްދެމުންދާ ކަމަށެވެ.
އެކްސިޑެންޓު ވީއިރު ސައީދު އާއެކު ކާރުގައި އޭނާގެ ބޭބެ އާއި އިތުރު ދިވެއްސަކު އިނެވެ. އެ ދެމީހުންނަށް މާބޮޑު ގެއްލުމެއް ލިބިފައެއް ނުވެ އެވެ.
އެކްސިޑެންޓުވީ އެމީހުން އެއާޕޯޓުން، ހޮޓަލަށް ދިޔަ މަގުމަތީގަ އެވެ. މައުލޫމާތު ލިބިފައިވާ ގޮތުގައި އެކްސިޑެންޓް ހިނގާފައި ވަނީ ޑްރައިވަރަށް ނިދިޖެހުމުގެ ސަބަބުންނެވެ.
