މި މަހުގެ 28 ވަނަ ދުވަހު ލޮކްޑައުންގެ މުއްދަތު ހަމަވާއިރު، ރައްޔިތުންގެ މަޖިލީހުގެ ތަޅުމުގައި ޖަލްސާތައް ނުބޭއްވި އިތުރަށް މަޑު ކުރެވެން ނެތް ކަމަށް ޑިރެކްޓަ ޖެނެރަލް އޮފް ޕަބްލިކް ހެލްތު މައިމޫނާ އަބޫބަކުރަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވަނީ އަންގަވާފައެވެ.
ރައްޔިތުންގެ މަޖިލީހުގެ މެންބަރުން ތިއްބަވާ ވަޓްސްއެޕް ގްރޫޕްގައި ރައީސް ނަޝީދު ފޮނުއްވި މެސެޖެއްގައި ވަނީ ލޮކްޑައުނާ މެދު އެޗްޕީއޭއިން އަންނަ ބުރާސްފަތި ދުވަހު ގޮތެއް ނިމެން ދެން މަޑުކުރެން ނެތް ވާހަކަ ޑިރެކްޓާ ޖެނެރަލް އޮފް ޕަބްލިކް ހެލްތަށް އަންގަވާފައި ވާނެ ކަމަށާއި މާދަމާ ތަޅުމުގައި ޖަލްސާ ބާއްވާނެ ކަމަށެވެ.
ނަމަވެސް މަޖިލީހުގެ ޖަލްސާ ބޭއްވުމަށް ރަސްމީކޮށް ހުށަހަޅާފައި ނެތް ކަމަށް މިރޭ ބޭއްވި ނޫސްވެރިންގެ ބައްދަލުމުގައި އެންއޯއީސީގެ ތަރުޖަމާނު މަބްރޫކް އަޒީޒް ވަނި ވިދާޅުވެފައެވެ.
މި މައްސަލާގައި ބައެއް މެމްބަރުން އަންނަނީ މީސް މީޑިއާގައި ކަންބޮޑުވުން ފާޅުކުރައްވަމުންނެވެ. އެގޮތުން ލޮކްޑައުން އުވާނުލަނީސް މާދަމާ ބާއްވަން މަޖިލީހުގެ ޗެމްބަރުގައި ބާއްވަން ތައްޔާރުވަމުންދާ ޖަލްސާ އަަށް ހާޒިރުވެވެން ނެތްކަން ތިމަރަފުށީ ދާއިރާގެ މެމްބަރު އަބްދުﷲ ރިޔާޒު ވަނީ ވިދާޅުވެފައެވެ. އަދި ރައްޔިތުން މަޖިލީހުގެ ބައެއް އެމްޑީޕީ މެންބަރުން ވެސް އަންނަނީ މިކަމާއި ގުޅިގެން ނުރުހުން ފާޅުކުރަމުންނެވެ.
Ads by STO
