5 މެމްބަރަކު ދިރިއުޅުއްވާ ގެތައް މޮނިޓަރިންގެ ހާލަތަށް ގެނެސްފައިވޭ: ނަޝީދު
ރައްޔިތުންގެ މަޖިލީހުގެ ފަސް މެމްބަރަކު ދިރިއުޅުއްވާ ގެތައް މޮނީޓަރިންގެ ހާލަތައް ގެނެސްފައިވާ ކަމަށް މަޖިލީހުގެ ރައީސް، މުހައްމަދު ނަޝީދު ވިދާޅުވެއްޖެއެވެ.
ދުވަސްތަކަކަށް ފަހު މަޖިލިސް ތަޅުމުގައި ބޭއްވި މިއަދުގެ ޖަލްސާ ފައްޓަވައިދެއްވައި، ހާޒިރީ އިއުލާނުކޮށްދެއްވަމުން ނަޝީދު ވިދާޅުވީ ފަސް މެމްބަރަކު ދިރިއުޅުއްވާ ގެތައް މޮނީޓަރިންގ އަށް ލާފައި ވާތީ، މިއަދުުގެ މަޖިލީހުގެ ޖަލްސާގައި ބައިވެރިވެވަޑައިނުގަނެވުނު ކަމަށެވެ. ނަމަވެސް އެއީ ކޮން މެމްބަރުން ކަމެއް ނަޝީދު ވިދާޅުވެފައެއް ނުވެއެވެ.
ނަޝީދު ވިދާޅުވީ އިތުރު އަދި އިތުރު ފަސް މެމްބަރަކު ސަލާމުގައި ތިއްބެވި ކަމަށާއި އެހެންކަމުން މިއަދުގެ ޖަލްސާއަށް ހާޒިރުވެވަޑައިގެން ތިއްބެވީ 47 މެމްބަރުން ކަމަށެވެ.
މަޖިލީހުގެ މިއަދުގެ ޖަލްސާގައި ކުރިއަށް ދަނީ ގާނޫނު އަސާސީ އިސްލާހު ކުރުމުގެ ބިލުގެ އިބްތިދާއީ ބަހުސްގެ މަރުހަލާ އެވެ.
މަޖިލީހުގެ ޖަލްސާތައް އަލުން މާލަމުގައި ބާއްވަން ފަށާއިރު ޖަލްސާތައް ބާއްވާނީ ގައިދުރުމިން ހިމެނޭ ގޮތަށް ރައްކާތެރި ކަމުގެ ފިޔަވަޅުތަކެއް އަޅައިގެންނެވެ. އެ ގޮތުން މާލަމުގެ އެއް މޭޒެއްގައި ދެ މެންބަރުން ނުތިއްބަވާނެ އެވެ. އަދި މާލަމުގައި އެއް ވަގުތެއްގައި ގިނަވެގެން ތިއްބަވާނީ 42 މެންބަރުން ކަމަށް ވަނީ ހަމަޖައްސައިފަ އެވެ.
