މާލަސްތަކެއް ނުވެ މާސްކް އަޅައިގެން ވާހަކަ ދައްކަން މެމްބަރުން ފަރިތަވެދާނެ: ނަޝީދު
ރައްޔިތުންގެ މަޖިލީހުގެ ޖަލްސާގައި މެމްބަރުން މާސްކު އަޅުއްވައިގެން ވާހަކަ ދައްކަވަމުން މާ ލަސްތަކެއްނުވެ އާދަވެދާނެ ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.
މިއަދު މަޖިލީހުގެ ޖަލްސާ މާސްކް އަޅުއްވައިގެން ފައްޓަވާފައި ވާއިރު، ބައެއް މެމްބަރުން މާސްކާއެކު ވާހަކަ ދެއްކުމުގައި އުނދަގޫތަކާ ކުރިމަތިވާ ކަމަށް ވިދާޅުވެ އެ ވާހަކަ ދައްކަވާފާވާތީ ރައީސް ނަޝީދު ވިދާޅުވީ މާސްކާއެކު ވާހަކަ ދައްކަވަން ފަރިތަވާނެ ކަމަށެވެ.
މިއަދުގެ މަޖިލީސް ނިމުމުގެ ކުރިން ފަރިތަވާނެ ކަމަށް ރައީސް ނަޝީދު ވިދާޅުވި އިރު، ވާހަކަ ދެއްކާއިރު މާސްކް ވެއްޓޭ ކަމަށް ބައެއް މެމްބަރުން ވަނީ ފާހަގަ ކުރައްވާފައެވެ.
މަޖިލިސް ރައީސް ވިދާޅުވީ، މާސް އަޅުއްވައިގެން ތިއްބަވައިގެން ވާހަކަދައްކަވަން އުނދަގޫވާނެ ކަމަށް ގަބޫލުކުރައްވާ ކަމަށާއި އެހެން ނަމަވެސް އެދިވަޑައިގަންނަވަނީ މާސްކުގައި ތިއްބަވައިގެން މިކަން ކޮށްދެއްވުން ކަމަށެވެ.
ނަޝީދު ވިދާޅުވީ މާސްކު އަޅުއްވައިގެން ވާހަކަ ދައްކަވާ އިރު މޫނުމަތީގެ އިތުރު ހަރަކާތްތައް ނުވަތަ މޫނުމަތީގެ ވައްތަރުތައް ކުޑަކޮށްލެއްވީމައި ވަރަށް ފަސޭހަ ވާނެ ކަމަށެވެ.
މިއަދުގެ މަޖިލީސް ފަށާފައި ވަނީ ރައްކާތެރިކަމުގެ ފިޔަވަޅެއްގެ ގޮތުން ގައިދުރު ކުރުކަން ބަހައްޓައިގެންނެވެ. މޭޒެއްގައި ވެސް އެއް މެމްބަރު އިންނަވާއިރު ބާކީ މެމްބަރުން ތިއްބެވީ ވަކިން ގައިދުރު ކަމާ އެކު ގޮނޑިތަކުގައެވެ. ކޮންމެ މެންބަރެއްގެ ދޭތެރޭ މަދުވެގެން ދެ މޭޒު ދޫކޮށްފައި ވެއެވެ.
