މާލޭގައި ކޮވިޑް ފަތުރާނެ ކަމަށް ބުނެވުނީ ސްޓްރެސްވެފައި ހުރުމުން، މަޢާފަށް އެދެން: މުޙައްމަދު އިބްރާހީމް
އެންއީއޯސީގެ ނޫސްވެރިންގެ ބައްދަލުވުން ކުރިއަށް ގެންދިޔަ ވަގުތު ޗެނަލްއެއްގެ ފޭސްބުކް ލައިވް އަކަށް ކުރި ކޮމެންޓެއްގައި، ކޮވިޑް-19 ޖެހިއްޖެނަމަ، އެއްވެސް އިދާރާއަކަށް އެކަން ނާންގާ، މުޖުތަމަޢުގައި ބަލި ފަތުރާނެ ކަމަށް ރޭ ބުނުމުން، ހޫނުފެނަށް ވެއްޓުނު މުޙައްމަދު އިބްރާހީމް ރައްޔިތުންގެ ކިބައިން މަޢާފަށް އެދިއްޖެއެވެ.
އޭނާ މަޢާފަށް އެދިފައިވަނީ، ފޭސްބުކްއިން އޭނާ ކުރި ލައިވްއެއްގައެވެ. މި ލައިވްގައި އޭނާ ބުނީ، އެގޮތަށް ކަންކުރެވުނީ ސްޓްރެސްވެފައިލެއް ބޮޑު ކަމުން ކަމަށެވެ. އަދި މާލޭގައި ރަށަށް ނުދެވި ތާށިވެފައި ހުރުމުގެ ސަބަބުން ސިކުނޑިއަށް ނޭދެވޭ އަސަރުކޮށްފައިވާ ކަމަށާއި އަދި ބުނެފައިވަނީ އޭނާއަކީ ޓެރެރިސްޓެއް ނޫން ކަމަށާއި އެފަދަ ގޮތަކަށް މަސައްކަތެއް ނުކުރާނެ ކަމަށެވެ. އަދި މިވީޑިއޯގައި ބުނެފައިވަނީ އޭނާ ހުރީގޭގައި ލޮކްޑައުންގައި ކަމަށާއި ކޮމިއުނިޓީ ސްޕްރެޑްއަކަށް އޭނާ މަސައްކަތް ނުކުރާ ކަމަށެވެ.
"އަޅުގަނޑު ސްޓްރެސްވެފައި ހުރުމުގެ ސަބަބުން، ބޭއިޚްތިޔާރުގައި ކުރެވުނު ކަމެއް" މުޙައްމަދު އިބްރާޙީމް ބުންޏެވެ.
ހޫނު ފެނަށް ވެއްޓުމުގެ ސަބަބުން މަޢާފަށް އެދުނު މުޙައްމަދު އިބުރާހިމް ވަނީ، އޭގެ ކުރިން ވެސް އޭނާ ވަނީ ފޭސްބުކްގައި އެފަދަ ވާހަކަތަކެއް ދައްކާފައެވެ. އެގޮތުން އެއް ޕޯސްޓެއްގައި ބުނެފައި ވަނީ މާލޭގައި ތާށިވި މީހުންނަށް އަވަހަށް ރަށަށް ދެވޭނެ ގޮތަކީ ބަލި ޖެހި، ބަލި އިތުރަށް ފަތުރާލުން ކަމަށެވެ. އިތުރު ޕޯސްޓެއްގައި އޭނާ ވަނީ މާލޭގައި ތިބި މީހުން މަގުމައްޗަށް ނިކުމެ ބަލި "ކޮމިއުނިޓީ ސްޕްރެޑަކަށް ހަދާލަން." ވެސް ލަފާ ދީފައެވެ.
