ސުޕްރީމް ކޯޓުގެ ލަފައެއް ހޯދުމަށް މަޖިލީހަށް ޤަރާރެއް ހުށަހަޅައިފި
މިހާރު އޮތް ކައުންސިލް ތަކުގެ ދައުރު ދަންމާލުމުގެ މައްސަލައިގައި ސުޕްރީމް ކޯޓުގެ އިސްތިޝާރީ ލަފައަކަށް އެދިމަށް މަޖިލީހަށް ގަރާރެއް ހުށަހަޅައިފި އެވެ.
ހަނިމާދޫ ދާއިރާގެ މެމްބަރު އަބްދުއްޣަފޫރު މޫސާ ހުށަހެޅުއްވި މި ޤަރާރުގައި ބުނެފައިވަނީ މިހާރު އިންތިހާބު ކޮށްފައި ތިބި ކައުންސިލް ތަކަކީ ތިން އަހަރަށް އިންތިހާބު ކޮށްފައިވާ ކައުންސިލްތަކެއް ކަމަށާއި ކައުންސިލްތަކުގެ ދައުރު ހަމަވާއިރު އަދި އެ މުއްދަތު ހަމަވުމުގެ ކުރިން އާ ކައުންސިލެއް އިންތިހާބު ކުރަންޖެހޭނެކަމަށް ޤާނޫނުގައި ބަޔާންކޮށްފައިވާ ކަމަށެވެ.
ގަރާރުގައި ބުނެފައި ވަނީ ކޮވިޑް19އާ ގުޅިގެން އިންތިހާބު ފަސްކޮށްފައިވާކަމަށާއި، އަދި އިންތިހާބެއް ބޭއްވެންދެން ކައުންސިލްތަކުގެ ދައުރު ދަންމާލުމަށް ޤާނޫނުއަސާސިއަށް އިސްލާހު ގެނައުމަކީ މިކަމުގައި އޮތްގޮތް ކަމަށް މަޖިލީހަށް އިއްތިފާގު ނުވެވޭކަމަށެވެ.
އެހެންކަމުން ކައުންސިލަރުން އެމީހުންގެ މަގާމުގައި ދެމިތިބުމުން ދިމާވެދާނެ ޤާނޫނީ މައްސަލައަކާއި ގުޅޭގޮތުން ސުޕްރީމް ކޯޓުގެ އިސްތިޝާރި ލަފައެއް ހޯދުމަށް އެދޭކަމަށް ގަރާރުގައި ބުނެފައިވެއެވެ.
ސުޕްރީމް ކޯޓުގެ ލަފައެއް ހޯދަން ތަޅުމަށް ހުށަހެޅިއިރު، ކައުންސިލްތަކަށް އަންނަ ގާނޫނީ ހުސްކަން ފޫބެއްދޭނީ ކައުންސިލްތަކުގެ ދައުރު ދިރުކުރަން ގާނޫނު އަސާސީ އިސްލާހުކޮށްގެން ކަމަށް ބަންޑާރަ ނައިބު އިބްރާހިމް ރިފްއަތާއި މަޖިލީހުގެ ކައުންސިލަ ޖެނެރަލް ފާތިމަތު ފިލްޒާ މަޖިލީހަށް ލަފާ ދެއްވި އެވެ.
ައަދި މިއަދުގެ ޖަލްސާގައި ވާހަކަ ދައްކަވަމުން މަޖިލީހުގެ ރައީސް މުހައްމަދު ނަޝީދު ވެސް ވަނީ ބަންޑާރަ ނައިބާއި ކައުންސިލަ ޖެނެރަލްގެ ލަފައަށް ބައެއް މެމްބަރުންނަށް އެއްބަސްނުވެވޭތީ ސުޕްރީމް ކޯޓުގެ ލަފައެއް ހޯދުމާ ގުޅޭ ގޮތުން ވެސް ވާހަކަ ދައްކަވާފައިވެ އެވެ.
