ލޮކްޑައުންއާ ހިލާފުވުމުން ކުރާ ޖޫރިމަނާ އޮންލައިންކޮށް ދެއްކޭނެ: މީރާ
ލޮކްޑައުން އަމުރާއި ހިލާފު ވުމުން ކުރާ ޖޫރިމަނާ ވެސް އޮންލައިންކޮށް ދެއްކޭނެ ކަމަށް ދައުލަތުގެ ޓެކްސް އިދާރާ، މީރާ އިން ބުނެފި އެވެ.
މިއަދު ބޭއްވި ނޫސްވެރިންގެ ބައްދަލުވުމުގައި ކޮމިޝަނާ ޖެނަރަލް އޮފް ޓެކްޒޭޝަން ފަތުހުﷲ ޖަމީލް ވިދާޅުވީ ލޮކްޑައުންއާ ހިލާފުވުމުން ކުރާ ޖޫރިމަނާ ވެސް އޮންލައިން ކޮށް ދެއްކޭނެ ކަމަށެވެ.
ލޮކްޑައުން ކުރި ފަހުން މިހާތަނަށް 5،657 މީހަކު އަމުރާ ހިލާފުވެގެން ފުލުހުން ވަނީ ޖޫރިމަނާ ކޮށްފައެވެ.
ފަތުހުﷲ ވިދާޅުވީ ޖޫރިމަނާކުރި މީހުންގެ ތެރެއިން ފައިސާ ދައްކާފައި ވަނީ ވަރަށް މަދު ބައެއް ކަމަށާއި އެކަން އެގޮތަށް ދިމާވަނީ މީރާގެ ކައުންޓަރުތައް ބަންދު ކުރުމާ ގުޅިގެން ކަމަށް ބެލެވޭ ކަމަށެވެ. އަދި ޖޫރިމަނާ އިން ލިބެންޖެހޭ ފައިސާގެ ސީދާ އަދަދު ޔަގީންކަމާއި އެކު ބުނަން ނޭނގޭ ކަމަށް އޭނާ ވިދާޅުވިއެވެ.
އޭގެ އިތުރުން، 570 އެއްހާ މީހުން ޖޫރިމަނާ އަށް މައާފް ކޮށްދޭނެ ކަމަށް ވިދާޅުވެފައިވާއިރު މައާފް ކޮށްދޭނީ މީރާއިން ގޮސް ހަދާފައިވާ އޮޑިޓްއަކާއި ގުޅިގެން ކަމަށް ފަތުހުﷲ ވިދާޅުވިއެވެ. އަދި ވިޔަފާރި ފައިސާއިން ޓެކްސް ނެގުމާއި ޖީއެސްޓީ މައިގަނޑު ގޮތެއްގައި ހިމެނެނީ މައާފުކޮށްދިން ފައިސާގެ ގޮތުގައި ކަމަށް މީރާ އިން ވަނީ ބުނެފަ އެވެ.
