ނަރުހުގެ ހާލަތު ކުރީބައިގަ ބައްޕައަށް އަންގާފައެއް ނުވޭ، ނަރުސް ދަތުރުކުރީ ބައްޕަގެ ލޯންޗުގައި: ޑްރައިވަރުގެ ދަރިފުޅު
ޅ. ހިންނަވަރަށް ނިސްބަތްވާ ނަރުހެއް ހޯމް އައިސޮލޭޝަނަށް އެރަށަށް ފޮނުވިއިރު، އެނަރުސް މީހާގެ ހާލަތު އޭނާ ގޮވައިގެން ދިޔަ ލޯންޗު ދުއްވަން އިން މީހާއަށް އަންގާފައި ނުވާ މައްސަލައެއް ފެންމަތިވެއްޖެއެވެ.
ޅ. އަތޮޅު ހޮސްޕިޓަލަށް ނިސްބަތްވާ ދެ ނަރުހެއް ހޯމް އައިސޮލޭޝަނަށް ފޮނުވާލެވިފައިވާ ކަމަށާއި ދެ ނަރުސް ވެސް ފޮނުވީ ކޮވިޑް-19 ގެ ކޭސްތަކެއް ފެނިފައިވާ ރަށެއް ކަމުގައިވާ ނ. މަނަދޫގައި އުޅެފައި ދިޔުމުން، ރައްޔިތުންގެ ރައްކަލަކަށްޓަކައި ކަމަށް އެހޮސްޕިޓަލުން ބުނެފައިވެއެވެ. އެ ދެ ނަރުހުން މަނަދޫއަށް ގެންގޮސްފައި ވަނީ ނ. އަތޮޅު ހޮސްޕިޓަލްގައި ފެނިގެން ދިޔަ ކޮވިޑް-19 ކޭސްއާއި އެކު އެ ހޮސްޕިޓަލްގެ ގިނަ ބަޔަކު ކަރަންޓީން ކުރުމާއި ގުޅިގެން އެތަނުގެ މަސައްކަތް ހުއްޓުމަކަށް ދިޔުމުންނެވެ.
މަނަދޫއިން އެދެނަރުހުން އެނބުރި ނައިފަރަށް ގޮސްފައިވަނީ 25 މެއި ވަނަ ދުވަހުގެ ވަގުތެއްގައެވެ.
ޅ. އަތޮޅު ހޮސްޕިޓަލުގެ މެނޭޖަރ ޖައުފަރު އަބްދުﷲ އެހެން އޮންލައިން ނޫހަކަށް މައުލޫމާތު ދެެއްވަމުން ވިދާޅުވެފައިވަނީ އެހޮސްޕިޓަލުގެ ދެ ނަރުހެއް މަނަދޫއަށް ފޮނުވާފައިވަނީ އެރަށުން ފެނުނު ކޭސްތަކުގެ ކޮންޓެކްޓް ޓްރޭސިންގ ނިމި ސިއްޙީ މަރުކަޒުވެސް ޑިސްއިންފެކްޓްކޮށް ނިމުން ފަހުންނެވެ.
އެހެންކަމުން އެދެ ނަރުހުން އެޗްޕީއޭގެ މިންގަނޑުތަކުން ކަރަންޓީނު ކުރަން ނުޖެހޭނެ ކަމަށާއި ހޯމް އައިސޮލޭޝަނަށް ލެވިފައިވަނީ ކޮވިޑް-19 ގެ ކޭސްތަކެއް ފެނިފައިވާ ރަށެއްގައި އުޅެފައި އައުމުން ސަލާމަތީ ގޮތުން ހޮސްޕިޓަލުން އަޅުއްވާ ފިޔަވަޅެއްގެ ގޮތުން ކަމަށް ޖައުފަރު ވިދާޅުވެފައިވެއެވެ.
ނަމަވެސް މިކަމާއި ގުޅިގެން މިއަދު ވަނީ އެހެން ވާހަކައެއް ވެސް ފެންމަތިވެފައެވެ. ހޯމް އައިސޮލޭޝަނަށް ލެވުނު ދެ ނަރުހުންގެ ތެރެއިން އެއް ނަރުހަކީ ނައިފަރުގެ ނަރުހަކަށްވާއިރު އަނެއް ނަރުހަކީ ހިންނަވަރަށް ނިސްބަތްވާ ނަރުހެކެވެ.
ޅ.އަތޮޅު ހޮސްޕިޓަލުން އިންތިޒާމު ކޮށްގެން، ހިންނަވަރަށް އެނަރުސް ގެންގޮސްދިން ލޯންޗު ދުއްވަން އިން މުޙައްމަދު އަބްދުﷲ/ ދޮންލުނބޯގެ، އަށް އެނަރުހުގެ ހާލަތާއި ބެހޭ އެއްވެސް ކަމެއް އަންގާފައި ނެތް ކަމުގެ ވާހަކައެވެ.
ލޯންޗު ދުއްވަން އިން މީހާގެ އަންހެން ދަރިފުޅު މަރިޔަމް މިހްދާއު މުޙައްމަދު "ދެން" އަށް މައުލޫމާތު ދެމުން ބުނީ، ލޯންޗަށް ނަރުސް އެރުވުމުގެ ކުރިން އޭނާގެ ބައްޕައަށް، އެނަރުސް ކުއްޖާގެ ހާލަތު އަންގާފައި ނުވާ ކަމަށާއި އެހެންކަމުން އޭނަގެ ބައްޕަ ހުރީ އެއްވެސް ރައްކާތެރި ކަމެއްގެ ފިޔަވަޅެއް ނާޅާ ކަމަށެވެ.
"ބައްޕައަކީ ވެސް ބަލި މީހެއް. ނޭވާލުމުގެ މައްސަލަތަކެއް ހުރޭ. ނަރުސް މީހާ ގައިގަ އަތް ނުލިޔަސް ބައްޕައަށް ވެސް އެނގެންވާނެ ދޯ މޮނީޓަރިންނަށް ގެންދެވޭ މީހެއްކަން. އޭރުން ދޯ ރައްކާތެރި ވެވޭނީ. ލޯންޗުވެސް އޮތީ ޑިސްއިންފެކްޓް ނުކޮށް. ގޭގައި ތިބި އެންމެންވެސް މިތިބީ ހާސްކަމެއްގަ މިހާރު. އެޚަބަރު ފެނުނީމަ އެނގުނީވެސް ނަރުހުގެ ޙާލަތު" މިހްދާއު ބުންޏެވެ.
މުޙައްމަދުގެ ހާލަތު ބަޔާންކޮށްދީ ހޮސްޕިޓަލުގެ މެނޭޖަރ ޖައުފަރު އާއި ވާހަކަ ދެއްކި ކަމަށް މިހްދާއު ބުންޏެވެ. ނަމަވެސް ޖައުފަރުގެ ފަރާތުން އެދެވޭ ޖަވާބެެއް ނުލިބުން ކަމަށާއި، "އެއީ އެވަރު ކަމެއް ނޫން" ކަމަށާއި "ޑިއުޓީއަށް ނިކުންނަން ނަރުސް ކުއްޖާ ހުރީ ތައްޔާރަށް" ކަމަށް ޖައުފަރު ބުނި ކަމަށް ވެސް މިޙްދާއު ބުންޏެވެ.
މިކަމާއި ގުޅޭގޮތުން ހޮސްޕިޓަލުގެ ބަހެއް ހޯދާލުމަށް "ދެން" ގެ ފަރާތުން ހޮސްޕިޓަލުގެ މީޑިއާ ކޯޑިނޭޓަރ އުމަރު އިބްރާހިމް އަށް ގުޅާލެވޭތޯ މަސައްކަތް ކުރީމެވެ. ނަމަވެސް ފޯނަށް ޖަވާބު ނުދެއްވުމުގެ ސަބަބުން، މެނޭޖަރ ޖައުފަރު އެހެން ނޫހަކަށް ދެއްވި މައުލޫމާތު މިވަނީ ހިމަނާލާފައެވެ.
