ލޮކްޑައުންއަށް ލުއި ދިނަސް ސްކޫލްތަކާއި އޮފީސްތައް ނުހުޅުވާނެ: އަމީން
މާލޭގެ ލޮކްޑައުންއަށް ލުއި ދިނަސް މި ފޭސްގައި ސްކޫލްތަކާއި އޮފީސްތައް ނުހުޅުވާނެ ކަމަށް ހެލްތު މިނިސްޓަރު އަބްދުﷲ އަމީން ވިދާޅުވެއްޖެއެވެ.
މިރޭ ބޭއްވި ނޫސްވެރިންގެ ބައްދަލުވުމުގައި މިނިސްޓަރު އަމީން ވިދާޅުވީ ފުރަތަމަ ފިޔަވަހި ދިގު ދެމިގެންދާނީ ދެ ހަފްތާ އަށް ކަމަށާއި އެގޮތުން ފުރަތަމަ ފިޔަވަހީގައި އޮފީސްތައް ހުޅުވުމަށް ނިންމާފައި ނުވާ ކަމަށެވެ.
ނަމަވެސް އޮފީސްތައް ހިންގަން ބޭނުންވާ މިންވަރަށް ސަރުކާރުގެ ހުއްދައާއެކު މުވައްޒަފުން އޮފީހަށް ގެންދެވިދާނެ ކަމަށް އަމީން ވިދާޅުވިއެވެ. އަދި އިކޮނޮމިކް މިނިސްޓްރީގެ ހުއްދަޔާއެކު އަމިއްލަ އޮފީސްތަކާއި ކޮންސްޓްރަކްޝަން މަސައްކަތްތައް ކުރުމުގެ ފުރުސަތު އޮންނާނެ ކަމަށްވެސް އަމީން ވިދާޅުވިއެވެ.
ލޮކްޑައުންގެ ފުރަތަމަ ފިޔަަވަހީގައި ސްކޫލްތައް އަދިވެސް ހުންނާނީ ބަންދުކުރެވިފައި ކަމަށާއި އަދި އެއް ރަށުން އަނެއް ރަށަށް ދަތުރުކުރުމާއި، ޕާކްތަކާއި ބީޗްތައް ހުޅުވާނުލުމާއި، ކެފޭ އަދި ރެސްޓޯރެންޓުތަކަށް ގޮސްގެން ހިދުމަތް ހޯދުމާއި، ޖިމްތަކާއި ސެލޫންތައް ވެސް ނުހުޅުވާނެ ކަމަށްވެސް އަމީން ވިދާޅުވިއެވެ.
މީގެއިތުރުން ފުރަތަމަ ފިޔަވަހީގައި އެއާޕޯޓާއި، ގެސްޓް ހައުސްތަކާއި، ރިސޯޓުތަކުގެ އިތުރުން ކުޅިވަރު ކުޅޭ ތަންތަން ވެސް ނުހުޅުވާނެ ކަމަށް އަމީން ވިދާޅުވިއެވެ.
