ލޮކްޑައުންއަށް ލުއި ދިނުމާއެކު ބަލި ފެތުރޭ މިންވަރު އިތުރުވެދާނެ: ޑރ. ޝީނާ
މާލޭގެ ލޮކްޑައުންއަށް ލުއި ދިނުމާއެކު ބަލި ފެތުރޭ މިންވަރު އިތުރުވެދާނެ ކަމަށް ޑރ. ޝީނާ މޫސާ ވިދާޅުވެއްޖެއެވެ.
މިރޭ ބޭއްވި ނޫސްވެރިންގެ ބައްދަލުވުމުގައި ޝީނާ ވިދާޅުވީ ލުއިތަކެއް ދިނުމާއެކު ބަލި ފެތުރޭ މިންވަރު އިތުރުވުމަކީ އެކަށީގެންވާ ކަމެއް ކަމަށާއި ނަމަވެސް ލުއި ދޭން ނިންމީ އެ އަދަދު އިތުރުވި ނަމަވެސް ފަރުވާ ދެވޭނެ ކެޕޭސިޓީ ރާއްޖޭގައި ހުރުމުން ކަމަށެވެ.
މިހާތަނަށް ބަލި ފެތުރެމުންދިޔަ މިންވަރަށް ބަލާއިރު، ހާލަތު ގޯސްވެ ހޮސްޕިޓަލުގައި އަދި އައިސީޔޫގައި ވެސް އެޑްމިޓް ކުރާ މީހުންގެ ނިސްބަތް ދުނިޔޭގެ އެހެން ގައުމުތަކާ އަޅާ ބަލާއިރު ރާއްޖޭގައި ދަށްކަން ފާހަގަކުރެވޭ ކަމަށް ޑރ. ޝީނާ ވިދާޅުވިއެވެ.
އޭގެ ސަބަބަކީ ރާއްޖޭގެ އާބާދީ އަކީ އަދި ރާއްޖޭގައި މަސައްކަތް ކުރާ ބިދޭސީންގެ އާބާދީ އަކީ ވެސް ވަރަށް ޒުވާން އުމުރެއްގެ މީހުންތަކަކަށް ވުން ކަމަށްވެސް ޝީނާ ވިދާޅުވިއެވެ.
މީގެއިތުރުން މިހާތަނަށް ބަލި ޖެހިފައި ތިބި މީހުންގެ އަދަދަށް ބަލާއިރު، ބައްޔަށް ހުށަހެޅޭ ނުވަތަ ބަލި ޖެހިދާނެ ކަމުގެ ރިސްކުގައި ތިބި މީހުންވެސް ކޮންމެވެސް ވަރަކަށް މަދުވެފައިވާ ކަމަށްވެސް ޝީނާ ވިދާޅުވިއެވެ. އަދި ބިދޭސީންގެ ފަރާތުން އެހެން މީހުންނަށް ބަލި ފެތުރުމަށް އޮތް ރިސްކު ވެސް މިހާރު ކުޑަވެފައިވާ ކަމަށާއި މިހާރު ކޭސްތައް ފެންނަމުންދަނީ ގޭބިސީތަކުން ކަމަށްވެސް ޝީނާ ވިދާޅުވިއެވެ.
"މީގެ މާނައަކީ ބަލި އާންމުންގެ ތެރޭގައި ފެތުރޭ ޖުމްލަ ނިސްބަތް ކުޑަވެފައިވާ ކަމޭ" ޝީނާ ވިދާޅުވިއެވެ.
