ލޮކްޑައުންނާ ހިލާފުވެގެން ހައްޔަރުކުރި 107 މީހަކު އަދިވެސް ބަންދުގައި!
ކޮވިޑާ ގުޅިގެން މާލޭގައި އިއުލާނުކުރި ލޮކްޑައުނާ ހިލާފަށް މަގުމަތީ އުޅުގެން ހައްޔަރުކުރި މީހުންގެ ތެރެއިން 107 މީހަކު އަދިވެސް ފުލުހުންގެ ބެލުމުގެ ދަށުގައި އެބަ ތިބިކަމަށް އެ އިދާރާއިން ބުނެފިއެވެ.
ފުލުހުން ބުނީ އިއްޔެވެސް ގައިވައިދާ ހިލާފަށް މަގުމަތީ އުޅެގެން ފަސް މީހަކު ހައްޔަރުކުރެވިފައިވާކަމަށެވެ. އެއީ މާލެ ސިޓީން ހަތަރު މީހަކާއި، ހުޅުމާލެއިން އެކަކު ކަމަށެވެ. އަދި ހައްޔަރު ކުރެވުނު މީހުންގެ ތެރެއިން 107 މީހަކު ފުލުހުންގެ ބެލުމުގެދަށުގައި އަދިވެސް ތިބިކަމަށް ހާމަކޮށްފައިވެއެވެ.
ފުލުހުންވަނީ ލޮކްޑައުނާއި ހިލާފަށް އިއްޔަ މަގުމަތީ އުޅެގެން 155 ޖޫރިމަނާ ކޮށްފައެވެ. އެގޮތުން މާލެއިން 145 މީހުން ޖޫރިމަނާކުރިއިރު ހުޅުމާލެއިން އަށް މީހަކާއި ވިލިމާލެއިން ދެ މީހަކު ޖޫރިމަނާ ކުރެވުނުކަމަށް ފުލުހުން ބުނެ އެވެ.
މިހާތަނަށް އައި އިރު ލޮކްޑައުނާއި ހިލާފުވެގެން ފުލުހުން ވަނީ ޖުމުލަ 281 މީހަކު ހައްޔަރުކޮށްފައެވެ. އަދި ޖުމުލަ 5812 މީހަކު ޖުރިމަނާ ކޮށްފައިވާކަމަށް ފުލުހުން މައުލޫމާތު ދީފައިވެއެވެ.
