މަޖިލީހުގައި ނެގި ވޯޓުގައި އެމްޑީޕީގެ ހަތަރު މެންބަރަކު ވިޕްލައިނާ ހިލާފުވެއްޖެ
ގާނޫނުއަސާސީ އަށް އިސްލާހު ގެނެސްގެން މިހާރު ތިބި ކައުންސިލަރުންގެ ދައުރު ދިގު ދަންމާލުމަށް ހުށަހަޅާފައިވާ އިސްލާހު ރައްޔިތުންގެ މަޖިލީހަށް ބަލައިގަތުމަށް ސަރުކާރު ހިންގާ މައިޕާޓީ އެމްޑީޕީ ޕާލިމަންޓްރީ ގްރޫޕުން ތްރީލައިން ވިޕެއް ނެރެފައި ވަނިކޮށް އެ ވިޕާއި ހިލާފަށް ހަތަރު މެންބަރަކު ވޯޓު ދެއްވައިފިއެވެ.
އެ ބިލު ބަލައިގަތުމާއި ދެކޮޅަށް ވޯޓު ދެއްވި ހަތަރު އެމްޑީޕީ މެންބަރުންނަކީ މާފަންނު އުތުރު ދާއިރާގެ މެމްބަރު އިމްތިޔާޒް ފަހުމީ (އިންތި) އާއި މަޑަވެލީ ދާއިރާގެ މެމްބަަރު ހުސައިން ފިރުޝާނާއި މައްޗަންގޮޅި އުތުރު ދާއިރާގެ މެމްބަރު މުހައްމަދު ރަޝީދު އަދި އުނގޫފާރު ދާއިރާގެ މެމްބަރު މުހައްމަދު ވަހީދު (ވައްޑެ) އެވެ.
މި އިސްލާހު މަޖިލީހަށް ބަލައިގަތީ 60 މެންބަރުންގެ ވޯޓުންނެވެ. މި ބިލު ދިރާސާ ކުރާނީ މުޅި މަޖިލީހުގެ ކޮމެޓީއަކުންނެވެ.
ބިލު ބަލައިގަތުމާއި ދެކޮޅަށް ވޯޓު ދެއްވި ހަމައެކަނި އިދިކޮޅު މެމްބަރަކީ ނައިފަރު ދާއިރާގެ މެމްބަރު އަހުމަދު ޝިޔާމެވެ. އާއްމު ގާނޫނަކުން ކައުންސިލަރުންގެ ދައުރު ދަންމާލުމަށް މަސައްކަތް ކުރުމުން އެކަމާއި ދެކޮޅަށް ވާހަކަ ދެއްކި އެއް މެންބަރަކީ ޝިޔާމްއެވެ. އަދި ގާނޫނުއަސާސީ އިސްލާހު ނުކޮށް އެކަން ނުކުރެވޭނެ ކަމަށް ޝިޔާމް ދިޔައީ ތަކުރާރުކޮށް ވިދާޅުވަމުންނެވެ. ނަމަވެސް ގާނޫނުއަސާސީ އަށް ހުށަހެޅި އިސްލާހު ބަލައިގަތުމަށް ޝިޔާމް ވޯޓު ނުދެއްވި ސަބަބެއް އޭނާ ހާމައެއް ނުކުރައްވައެވެ.
މި ބިލާއި ގުޅިގެން މަޖިލީހުގެ މެޖޯރިޓީ އޮތް އެމްޑީޕީގެ މެމްބަރުންގެ މެދުގައި ވަނީ ހިޔާލުަފާތުވުންތައް އުފެދިފައެވެ.
އެކަމުގައި ބަންޑާރަ ނާއިބާއި އަދި ކައުންސެލާ ޖެނެރަލްވެސް ލަފާ ދެއްވާފައި ވަނީ މި ހާލަތުގައި ގާނޫނުއަސާސީ އިސްލާހު ކުރުމަށް އެއްވެސް ހުރަހެއް ނެތް ކަމަށެވެ.
