ނަމާދުކުރުން މަނާކޮށްފައިވާ ރަށްތަކުގައި އެ މުއްދަތު އަނެއްކާވެސް އިތުރުކޮށްފި
ކޮވިޑް-19އާ ގުޅިގެން ބައެއް ރަށްތަކުގައި ޖަމާއަތުގައި ނަމާދުކުރުން މަނާކޮށްފައިވާ މުއްދަތު އިސްލާމިކް މިނިސްޓްރީން އިތުރުކޮށްފިއެވެ.
އިސްލާމިކް މިނިސްޓްރީން ބުނީ ކޮވިޑް19އާ ގުޅިގެން ރާއްޖޭގެ ބައެއް ރަށްރަށުގެ މިސްކިތް ތަކުގައި ޖަމާއަތުގައި ނަމާދު ނުކުރާ ގޮތަށް ނިންމާފައި އޮތް އޮތުން އަންނަ މަހުގެ 11ވަނަ ދުވަހުގެ އަސުރު ނަމާދުގެ ނިޔަލަށް އިތުރު ކުރެވިފައިވާ ކަމަށެވެ.
މިހާތަނަށް ޖަމާއަތް ހެދުމަށް ހުއްދަ ނުދީ ވަނީ ހަތް ރަށެއްގައެވެ. އެނޫން ހުރިހާ ރަށެއްގައިވެސް ޖަމާއަތް ހެދުމަށް ވަނީ ހުއްދަ ދީފައެވެ. ހުއްދަ ނުދޭ ރަށްތަކަކީ ގްރޭޓާ މާލެ ސަރަހައްދު، ހއ. ތަކަންދޫ، ށ. ނަރުދޫ، ށ. މިލަންދޫ، ނ. މަނަދޫ، ކ. ހިންމަފުށި، އަދި ކ. ތުލުސްދޫއެވެ.
މިދިޔަ ހުކުރު ނަމާދުން ފެށިގެން މިވަގުތު ރާއްޖޭގައި ފުރަބަންދު ހާލަތުގައި ހުރި ރަށްރަށާއި، މޮނިޓަރިންގެ ހާލަތުގައި ހުރި ރަށްރަށާއި، އެރަށެއްގައި މީހަކު ކަރަންޓީނުކޮށްފައިވާ ރަށްތައް ފިޔަވާ އެހެން ރަށްރަށުގައި މިސްކިތްތަކުގައި ޖަމާއަތުގައި ނަމާދުކުރެވޭގޮތަށް ހުޅުވާލުމަށް ހުއްދަ ދީފައިވާ ކަމަށް އިސްލާމިކް މިނިސްޓްރީން މީގެކުރިން ވަނީ ބުނެފައެވެ.
