ފަރުވާ ލަސްވެގެން ތިން ކުޑަކުއްޖަކު މަރުވި ކަމަށް ބުނާ މައްސަލަ ބަލަން މަޖިލީހަށް!
އޭޑީކޭގައި ނިޔާވި ތުއްތު ކުއްޖާގެ މައްސަލަ އާއި އއ.ތޮއްޑޫ އަދި ށ.ނަރުދޫން ބަނޑަށް ދެ ކުދިން ނިޔާވި މައްސަލަ ބައްލައިވައިދެއްވުމަށް އެދި ނައިފަރު ދާއިރާގެ މެމްބަރު އަހުމަދު ޝިޔާމް ރައްޔިތުންގެ މަޖިލީހުގެ ރައީސް، މުހައްމަދު ނަޝީދަށް ސިޓީ ފޮނުއްވައިފިއެވެ.
އެގޮތުން އެ ސިޓީގައި ޝިޔާމް ވިދާޅުވީ މި މަހުގެ 14 ވަނަ ދވަހު ތޮއްޑޫގައި މާބަނޑު މީހަކު ރަށުން ފުރުމުގެ ހުއްދަ ލިބުން ލަސްވެ، ބަނޑަށް ދަރިފުޅު މަރުވި މައްސަލަ އަކާއި ށ. ނަރުދޫގައި މާބަނޑު މީހަކު ވިހަން ށ. ފުނަދޫ ހޮސްޕިޓަލަށް ގެންދަން ހުއްދަ ނުލިބި އެންމެ ފަހުން ހދ. ކުޅުދުއްފުށީ ރީޖަނަލް ހޮސްޕިޓަލަށް ގެންގޮސް، ވިހެއިރު ކުއްޖާ މަރުވެފައި އޮތް މައްސަލައިގެ އިތުރުން އޭޑީކޭ ހޮސްޕިޓަލަށް ގެންދިޔަ ހަތަރު މަހުގެ ކުއްޖަކު މަރުވުމުގައި ވެސް، އެ ކުއްޖާއަށް ފަރުވާ ދިނުން ލަސްވި ކަމަށް އާއިލާއިން ވަނީ ތުހުމަތު ކުރާ މައްސަލަ ބަލައިދޭން އެދި މަޖިލީހަށް ހުށަހަޅާ ކަމަށެވެ.
މި މަހުގެ 22 ވަނަ ދުވަހު ބަލިވެގެން އޭޑީކޭ އަށް ގެންދިޔަ ހަތަރުމަހުގެ ކުއްޖަކު ނިޔާވެފައިވަނީ ފަރުވާދިނުމުގައި އިހުމާލުވެގެން ކަމަށް އެ ކުއްޖާގެ އާއިލާއިން ތުހުމަތުކުރާ ކަމަށް ބުނެފައިވެއެވެ. އެގޮތުން ކުއްޖާ އަށް ދިމާވި ހާލަތަކީ ވަގުތުން ސާޖަރީ ކުރަންޖެހޭ ހާލަތެއް ކަމަށް ޑޮކްޓަރުން ފަރާތުން މައުލޫމާތު ލިބުނީ ކުއްޖާ ނިޔާވި ފަހުން ކަމަށާއި އެހެންކަމުން އެކުއްޖާ އަށް ފަރުވާނުދެވި ގިނައިރުތަކެއް ވެފައިވާ ކަމަށް އާއިލާއިން ބުނާ ކަމަށް އެ ސިޓީގައި ހާމަކޮށްފައިވެއެވެ.
