ލޮކްޑައުންކުރި ފަހުން މާލޭގެ މިސްކިތްތަކުން 16 ފަންކާ ވަގަށްނަގައިފި
މާލެ ފުރަބަންދުކުރި ފަހުން މާލޭގެ ހަތަރު މިސްކިތަކުން 16 ފަންކާ އާއި މައިކެއް ވަގަށް ނަގާފައިވާ ކަމަށް މާލޭ ސިޓީ ކައުންސިލުން ބުނެފިއެވެ.
މާލޭ ސިޓީ ކައުންސިލްގެ އޮފިޝަލަކު "ޕީއެސްއެމް" އަށް ވިދާޅުވީ އެންމެ ފަހުން ވައްކަންކޮށްފައި ވަނީ، މާލޭގެ މިސްކިތްތަކުގެ ތެރެއިން، މާފަންނު ބޮޑުގޭގައި ހަދާފައިވާ ވަގުތީ މިސްކިތުންނާއި، ހީނާމާގޭ ޕާކިންގެ ހުޅަނގު ފަރާތުން މަޖިދީ މަގަށްވާގޮތަށް ހުންނަ މިސްކިތް މަސްޖިދުލްޢާދިލް، ނުވަތަ ދެބުރި މިސްކިތުން ކަމަށެވެ.
މިގޮތުން މި މަހުގެ 26 ވަނަ ދުވަހުގެ ރޭ ބޮޑުގޭގައި ހަދާފައިވާ ވަގުތީ މިސްކިތުން 11 ފަންކާއެއް ވަގަށް ނަގާފައިވާ އިރު މަސްޖިދުލް އާދިލްއިން ވައްކަންކޮށްފައި ވަނީ ރޭ ނުވަތަ މިއަދުގެ ވަގުތެއްގައެވެ. އެމިސްކިތުން ވަގަށް ނަގާފައި ވަނީ ބަންގިގޮވުމަށް ބޭނުން ކުރާ ކޯޑުމައިކެވެ.
މީގެ އިތުރުން މާފަންނު އީދު މިސްކިތުން ދެ ފަންކާ ވަގަށް ނަގާފައިވާއިރު، ދަރުމަވަންތަ މިސްކިތުން ތިން ފަންކާއެއް ވަނީ ވަގަށް ނަގާފައެވެ.
ޖުމްލަ 16 ފަންކާއެއް ލޮކްޑައުންގެ ތެރޭގައި ވަގަށް ނަގާފައިވާއިރު، މުޅިންވެސް ވަގަށް ނަގާފައި ވަނީ ފާރުގައި ހަރުކުރާ ފަންކާއެވެ.
