ކުޅުދުއްފުއްޓާއި ހިތަދޫ ޕޯޓުން ވެސް ޑެމަރޭޖް ނުނަގާ ގޮތަށް ނިންމައިފި
ސިއްހީ ނުރައްކަލުގެ ހާލަތުގެ މުއްދަތުގައި ކުޅުދުއްފުއްޓާއި ހިތަދޫ ޕޯޓުން ވެސް ބައެއް ފީތައް ނުނަގަން ނިންމައިފައިވާ ކަމަށް މޯލްޑިވްސް ޕޯޓްސް ލިމިޓެޑުން (އެމްޕީއެލް) މިއަދު ބުނެފި އެވެ.
އެމްޕީއެލްގެ ދަށުން ހިންގަމުން އަންނަ ކުޅުދުއްފުށީ ޕޯޓްސް ލިމިޓެޑާއި، ހިތަދޫ ޕޯޓްސް ލިމިޑެޓްގެ ބޯޑުން ނިންމާފައިވަނީ 15 އެޕްރީލް 2020 އިން ޖޫން 5، 2020 އާއި ހަމައަށް މި ދެ ބަނދަރަށް ބާލާފައިވާ ހުރިހާ ބާވަތެއްގެ މުދަލުން އެއްވެސް ފީއެއް ނުނަގާ ގޮތަށް ނިންމާފައެެވެ.
މީގެ އިތުރުން މި ދެ ބަނދަރަށް 15 އެޕްރީލް 2020 ވަނަ ދުވަހާއި ހަމައަށް ޑެމަރޭޖް އަދި އެމްޓީ ކޮންޓެއިނާ ސްޓޯރޭޖް ފީ ނުނެގުމަށް ވަނީ ނިންމާފައެވެ. އަދި މުދާތައް ކްލިއާ ކުރުމަށް ޖުލައި 5 ވަނަ ދުވަހާއި ހަމައަށް ވަނީ ވަގުތު ދީފައެވެ.
ހިތަދޫ ޕޯޓް އަދި ކުޅުދުއްފުށީ ޕޯޓުން މި ގޮތަށް ނިންމި އިރު މާލޭ ވިޔަފާރި ބަނދަރަށް މުދާ ގެންނަ ފަރާތްތަކަށްވެސް އެމްޕީއެލްއިން ވަނީ ބޮޑެތި ލުއިތަކެއް ދީފައެވެ.
