11 ދުވަހުގެ ތުއްތު ކުއްޖަކު ކޮވިޑަށް ފައްސި ވެއްޖެ، އަވަސް ޝިފާއެއް މިންވަރު ކުރައްވާށި!
އުމުރުން އެންމެ 11 ދުވަހުގެ ތުއްތު ކުއްޖަކު ކޮވިޑް-19 އަށް ފައްސި ވެއްޖެއެވެ.
ހެލްތު ޕްރޮޓެކްޝަން އެޖެންސީ(އެޗްޕީއޭ) އިން ބުނި ގޮތުގައި އެންމެ ފަހުން ރާއްޖޭން ކޮވިޑަށް ފައްސިވި މީހުންގެ ތެރޭގައި އުމުރުން އެންމެ 11 ދުވަހުގެ ކުއްޖަކާއި 89 އަހަރުގެ މީހަކު ހިމެނޭ ކަމަށެވެ.
މިއީ މިހާތަނަށް ރާއްޖޭގައި މި ބަލި ޖެހުނު އެންމެ ދުވަސްވީ މީހާ އާއި އެންމެ ހަގު ކުއްޖާ އެވެ. އިއްޔެ ފައްސިވި މި ކުއްޖާއަކީ ފިރިހެން ކުއްޖެއް ކަމަށް އެޗްޕީއޭގެ ޑޭޝްބޯޑްގައި ބުނެފައިވެއެވެ.
އުމުރުން ދުވަސްވީ އަންހެން މީހާ، ފައްސިވި ކަމަށް އެޗްޕީއޭގެ ޑޭޝްބޯޑްގައި ބުނެފައި ވަނީ މިއަދު އެވެ.
މިއަދު ރާއްޖެއިން އިތުރު 56 މީހުން ފައްސިވި އިރު، ރާއްޖެއިން ޖުމްލަ ފައްސިވި މީހުންގެ އަދަދު މިހާރު ވަނީ 1،513 އަށް އަރައިފަ އެވެ. އޭގެ ތެރެއިން އުމުރުން ދުވަސްވީ މީހުންގެ ޖުމްލަ އަދަދު މަދެވެ.
އުމުރުން ދުވަސްވީ މީހުންނަށް ބޮޑަށް ނުރައްކާ އޮތް މި ބަލި ޖެހިގެން ރާއްޖޭން މަރުވި ފަސް މީހުންގެ ތެރެއިން ދެ މީހުންނަކީ ވެސް 80 އަހަރުން މަތީގެ މީހުންނެވެ.
