ސޯޝަލް މީޑިއާ ގައި މީހުން ފާޅުކުރާ ޖަޒުބާތުތަކުގައި ޖެހި އިންޑިއާ އަކީ މުސްލިމުންނާ ދެކޮޅު ބައެއް ކަމަށް ނުބެލެވޭނެ: ރާއްޖެ
އިންޑިއާ އަކީ މުސްލިމުންނާ ދެކޮޅު ގައުމެއްގެ ގޮތުގައި އެއްވެސް ވަރަކަށް ސިފަކުރުމަކީ ގޯހެއް ކަމަށް ރާއްޖެއިން ބުނެފިއެވެ. އަދި ސޯޝަލް މީޑިއާގައި މީހުން ފާޅުކުރާ ޖަޒުބާތު ތަކުގައި ޖެހި އެގޮތަށް ކަނޑަނޭޅޭނެ ކަމަށް ވެސް ރާއްޖެއިން ބުނެފައިވެއެވެ.
ރާއްޖެއިން މިހެން ބުނެ އިންޑިއާ ދިފާއުކޮށްފައިމިވަނީ މި މަހުގެ 23 ވަނަ ދުވަހު އޯގަނައިޒޭޝަން އޮފް އިސްލާމިކް ކައުންސިލް (އޯއައިސީ) ގެ އޮންލައިން ބައްދަލުވުމެއްގައި މުސްލިމުންނާއި ދެކޮޅަށް އިންޑިއާ އިން މަސައްކަތްތަކެއް ކުރާ ކަމަށް އ.ދ އަށް ކަނޑައަޅުއްވާފައި ހުންނަވާ ޕާކިސްތާނުގެ ސަފީރު މުނީރު އަކްރަމް ވިދާޅުވުމާ ގުޅިގެންނެވެ.
އޮންލައިން ކޮށް ކުރިއަށް ދިޔަ މި ބައްދަލުވުމުގައި ބައިވެރިވެ ވަޑައިގެންފައިވަނީ ރާއްޖެއިން އދ. އަށް ކަނޑައަޅުއްވާފައި ހުންނަވާ ސަފީރު ތިލްމީޒާ ހުސެއިން އެވެ.
އެގޮތުން ތިލްމީޒާ އިންޑިއާ ދިފާއުކުރައްވާ ދެއްކި ވާހަކަފުޅުގައި ވިދާޅުވީ ނަސްލީތަފާތުކުރުންތަކާއި އަނިޔާވެރިކަން ދުނިޔޭގައި ވަރަށް ބޮޑަށް އިތުުރުވެފައިވާ ކަމަށާއި އެފަދަ އަނިޔާވެރިކަން އިސްކުރަނީ ވަކި ސިޔާސީ މަގުސަދެއް ކަމަށެެވެ. އަދި ދުނިޔޭގެ އެއްވެސް ތަނެއްގައި އެފަދަ ގޮތަކަށް ކަންތައްތައް ހިނގުމަށް ރާއްޖެއިން ހިތްވަރުނުދާނެކަމަށް އޭނާ ވިދާޅުވިއެވެ.
ތިލްމީޒާ އިތުރަށް ވިދާޅުވީ އިންޑިއާއަކީ 200 މިލިއަން މުސްލިމުންގެ އާބާދީއެއް އޮންނަ ގައުމެއް ކަމަށާއި އަދި އިސްލާމްދީން އެގައުމުގައި އޮންނަތާ މިހާރު އެތަކެއް ގަރުނެއް ވެއްޖެކަމަށެެވެ. އަދި "އިސްލާމަފޯބިއާ" ފަދަ ތުހުމަތުތަކުގެ ސަބަބުން ދެކުނު އޭޝިއާގެ ހަމަޖެހުމަށް ބުރޫ އަރާނެ ކަމަށެެވެ.
އަދި ސޯޝަލް މީޑިއާ ގައި މީހަކު ދައްކާ ވާހަކައަކީ އިންޑިއާ ގެ އިންޑިއާގެ 1.3 ބިލިއަން މީހުންގެ އިހުސާސްތަކެއް ނޫން ކަމަށާއި އިންޑިއާއަށް އެކަނި ޓާގެޓްކޮށްގެން އޯއައިސީން ނަގާ ފިޔަވަޅުތަކަށް ރާއްޖެއިން ތާއިދު ނުކުރާނެ ކަމަށް ވެސް އޭނާ ވިދާޅުވިއެވެ.
ރާއްޖޭގެ އިތުރުން އެކުވެރި އަރަބި އިމާރާތުން ވެސް ވަނީ ޕާކިސްތާނު ސަފީރު ގެ ވާހަކަ އާ ގުޅިގެން އިންޑިއާ ދިފާއުކޮށްފައެވެ.
Ads by STO
