އިޖުތިމާޢީ ގައިދުރުކަމާއެކު މުސްކުޅިން ބަލަހައްޓާ ގެތަކުގައި ތިބި މީހުން އިތުރަށް ނިކަމެތިވެ އެކަނިވެރި ވެއްޖެ- އަލްޖަޒީރާ
ދުނިޔޭގެ ތަރައްގީވެފައިވާ ގައުމުތަކުގައި މައިންބަފައިން މުސްކުޅިވުމުން އަދި ދަރިން ވަޒީފާއާއި އެހެނިހެން ކަންކަމުގައި މަސްއޫލުވުމުން މައިންބަފައިން މުސްކުޅިން ބަލަހައްޓާ ގެތަކަށް ދޫކޮށްލުމަކީ ވަރަށް އާންމު ކަމެކެވެ. މިގޮތަށް ދޫކޮށްލެވޭ މައިންބަފައިން އެ ގެތަކުގައި ތިބޭ އެއް އުމުރެއްގެ އެހެންމީހުނާއެކު ރަޙްމަތްތެރިވެ އެއީ ވެސް އާއިލާ ކަމުގައި ދެކިގެން، އަމިއްލަ އާއިލާ އާ ދުރުގައި ވުމުން ލިބޭ ހިތާމަ ކުޑަކުރެވޭތޯ އެކަކު އަނެކެއްގެ އެހީތެރިއަކަށް ވެއެވެ. ނަމަވެސް ކޮރޯނާވައިރަސްގެ ބިރަށް މިފަދަ ގެތަކުގައި އުޅުމުގައިވެސް ގައިދުރުކުރުން ބަހައްޓަން ޖެހުމުން އެފަދަ މީހުން އިތުރަށް އެކަނިވެރިވެ ނިކަމެތި ވެއްޖެކަމަށް އަލްޖަޒީރާގެ ރިޕޯޓެއްގައި ހާމަ ކޮށްފައިވެއެވެ.
މިގޮތަށް ބޭތިއްބޭ މީހުންގެ ގާތަށް އެމީހުންގެ އާއިލާތަކުން ވެސް ޒިޔާރަތް ކުރެއެވެ. ނަމަވެސް ކޮރޯނާވައިރަސް ގެ ބިރު އެންމެ ބޮޑީ މުސްކުޅިންނަށް ކަމަށްވުމުން، ހުރިހާ ގައުމެއްގައިވެސް މުސްކުޅިން ބަލަހައްޓާ ގެތަކަށް ބޭރުން މީހުން ޒިޔާރަތްކުރުން ވަނީ ވަގުތީގޮތުން މަނާކުރެވިފައެވެ. މި ފަދަ މުސްކުޅިންނަކީ ޓެކްނޮލޮޖީއަށް ވެސް އެހާ އަހުލުވެރި ބަޔަކަށް ނުވާތީ ދުނިޔޭގައި ހިނގާ ކަންތައްތަކުގެ ވާނުވާ ނޭނގި އެކަމުގެ ހާސްކަން ވެސް ވަރަށް ބޮޑު ކަމަށް އަލްޖަޒީރާއިން ހާމަ ކުރިއެވެ. ޒުވާނުންގެ ތެރެއިން ގިނަ މީހުންނަކީ މީސްމީޑިޔާގެ އެހީގައި ލޮކްޑައުންތައް ކަޑައްތުކުރަމުން ދާ މީހުން ނަމަވެސް މުސްކުޅިން ބަލަހައްޓާ ގެތަކުން ފެންނަނީ އެކަނިވެރިކަމާ، މާޔޫސްކަމާ ނިމުމެއް ނެތް އިންތިޒާރެވެ.
ބައެއް ގައުމުތަކުގައި މުސްކުޅިން ބަލަހައްޓާ ގެތަކަށް ޒިޔާރަތް ކުރެވުނަސް ކުރިން ކަންކުރާ އުސޫލުން މައިންބަފައިން ގޮވައިގެން ބާޒާރުކުރަން ގޮސް، ޕާކްތަކަށް ދިއުންވަނީ މަނާކުރެވިފައެވެ. ދުވަސްވީ މީހުންނަށް ނަފްސާނީ އަދި ޖިސްމާނީ ގޮތުން ލިބޭ ހަރަކާތްތެރިކަން ހުއްޓުމަކީ ވެސް އިތުރު މައްސަލަތަކަށް ހުޅުވޭ ދޮރެއް ކަމަށް، އަލް ޖަޒީރާގެ ރިޕޯޓަރުން ފާހަގަ ކުރެއެވެ. މިދަނޑިވަޅުގައި މުސްކުޅިން ބަލަހައްޓާ ގެތަކުގެ އިސްސަފުގައި މަސައްކަތް ކުރާ މީހުންގެ އެއްބާރުލުން ވަރަށް ބޮޑަށް ލިބޭ ކަމަށާ، މުސްކުޅިންގެ އެކަނިވެރިކަން ފިލުވައިދީ އެމީހުންގެ ހާސްކަމެއް ވާނަމަ އެކަން ސާފުކޮށްދިނުމުގައި ސިއްޙީއެހީތެރިން އަދާކުރާ ދައުރު ފާހަގަކޮށް އެކަން ޖަޒީރާގެ ރިޕޯޓްގައި ފާހަގަ ކޮށްފައިވެއެވެ.
