"ގާނޫނީ ހުސްކަމެއް ފޫބައްދަން ވިޔަސް، ކައުންސިލަރުން އައްޔަންކޮށްފިނަމަ ކައުންސިލުތަކުގެ މިނިވަންކަން ގެއްލޭނެ"
ގާނޫނީ ހުސްކަމެއް ފޫބައްދަން ވިޔަސް، ކައުންސިލަރުން އައްޔަން ކުރާ ގޮތަށް ހަމަޖައްސައިފި ނަމަ ކައުންސިލުތަކުގެ މިނިވަންކަން ގެއްލޭނެ ކަމަށް ތ.ގުރައިދޫ ދާއިރާގެ މެމްބަރު އަދި ޕީޕީއެމްގެ ނައިބު ރައީސް މުހައްމަދު ޣައްސާން މައުމޫން ވިދާޅުވެއްޖެއެވެ.
ޣައްސާން މިހެން ވިދާޅުވީ މާފަންނު އުތުރު ދާއިރާގެ މެންބަރު އިމްތިޔާޒު ފަހުމީ (އިންތި)މަޖިލީހުގައި ދެއްކެވި ވާހަކަ އަކާއި ގުޅިގެންނެވެ.
އިންތި ވިދާޅުވީ މިއީ ގާނޫނު އަސާސީ އިސްލާހުކުރަން ވީ ވަގުތު ނޫން ކަމަށާއި ކައުންސިލް އިންތިހާބު ނުބޭއްވުނު ނަމަވެސް ވަގުތީ ބަޔަކު ކައުންސިލަރު ކަމަށް ލައިގެން އެކަމަށް ހައްލު ހޯދޭނެ ކަމަށެވެ.
މިވާހަކަތަކަށް ރައްދު ދެއްވަމުން ޣައްސާން ވިދާޅުވީ ކައުންސިލަރުން އިންތިހާބު ކުރަނީ ރައްޔިތުންގެ ވޯޓުން ކަމަށާއި ގާނޫނީ ހުސްކަމެއް ފޫބައްދަން ވިޔަސް، ކައުންސިލަރުން އައްޔަނު ކުރާ ގޮތަށް ހަމަޖައްސައިފިނަމަ ކައުންސިލުތަކުގެ މިނިވަންކަން ގެއްލޭނެ ކަމަށެވެ.
"ގާނޫނު އަސާސީން ކަށަވަރުކޮށްދޭ ޗެކްސް އެންޑް ބެލެންސް ގެއްލޭނެ. މިކަހަލަ ވާހަކަފުޅަށް ރައްޔިތުން ސަމާލުވެ ވަޑައިގަންނަވާ." ޣައްސާން ވިދާޅުވިއެވެ.
Councilarun inthikhaab kuranee rayyithunge votun. Qaanoonee huskameh foobadhan viyas, councilarun ayyan kura gothah hamajasaifinama Local Council thakuge minivankan gelleyne. QA in kashavarukohdhey checks & balances gelleyne. Mikahala vaahakafulhah rayyithun samaalvevadainnavaa! pic.twitter.com/y5uXUGAcZI
— Mohamed Ghassan Maumoon (@mgmaumoon) May 29, 2020
ކައުންސިލަރުންގެ ދައުރު ދަންމާލަށް ސަރުކާރުގެ ފަރާތުން ގާނޫނު އަސާސީއަށް އިސްލާހު ހުށަހަޅާފައިވީ ނަމަވެސް، އެ މައްސަލައިގައި މަޖިލީހުގެ މެޖޯރިޓީ އޮތް އެމްޑީޕީގެ މެދުގައި ވަނީ ވަރަށް ބޮޑަށް ޚިޔާލު ތަފާތުވުން އުފެދިފަ އެވެ.
މި މައްސަލައިގައި ރައްޔިތުންގެ މަޖިލީހަށް ބަންޑާރަނައިބު އިބްރާހިމް ރިފްއަތު އަދި ކައުންސެލް ޖެނެރަލް ފާތިމަތު ފިލްޒާ ވެސް ވަނީ ލަފާދެއްވައިފައެވެ. އޭޖީ އަދި ކައުންސެލް ޖެނެރަލް ވެސް ވިދާޅުވެފައި ވަނީ މައްސަލައިގައި އޮތް ހަމައެކަނި ހައްލަކީ ގާނޫނު އަސާސީ އިސްލާހުކުރުން ކަމަށެވެ.
އެއާއެކު މިދިޔަ ބުދަ ދުވަހުގެރޭ ބޭއްވި މަޖިލީހުގެ ޖަލްސާގައި ވަނީ އެކަމާ ގުޅޭގޮތުން ސުޕްރީމް ކޯޓުގެ ލަފަޔެއް ހޯދުމަށް ފާސްކޮށްފައެވެ.
އެކަމާ ގުޅިގެން ސުޕްރީމް ކޯޓުން މަޖިލީހަށް މިއަދު ދެއްވި ލަފާގައި ބުނެފައިވަނީ ގާނޫނުގެ މާއްދާއަކަށް އިސްލާހު ގެނައުމުގެ ބަދަލުގައި އެހެން ބިލަކުން ގާނޫނުއަސާސީގެ 231 ވަނަ މާއްދާގެ ނައްސަށް އިސްލާހު ގެނެސް ނުވަތަ އެ މާއްދާގެ ނައްސަށް ބަދަލު ގެނައުމުގެ ބަދަލުގައި އެ މަގްސަދަށްޓަކައި ގާނޫނުއަސާސީގެ 13 ވަނަ ބާބުގެ ފަހަތަށް އިންތިގާލީ މާއްދާއެއް ހިމަނަން ފެންނަ ކަމަށެވެ.
