އެމްޑީޕީއަކީ ހިޔާލު ތަފާތުވުމުން ވަރަށް ގަދައަށް ޒުވާބު ކުރާ ބައެއް، ދެ ފެކްޝަނެއް ނޯންނާނެ: ރޮޒެއިނާ
އެމްޑީޕީއަކީ ހިޔާލު ތަފާތުވުމުން ވަރަށް ގަދައަށް ޒުވާބު ކުރާ ބައެއް ކަމަށާއި ނަމަވެސް ޕާޓީގެ ތެރޭގައި ދެ ފެކްޝަނެއް ނޯންނާނެ ކަމަށް މީދޫ ދާއިރާގެ މެމްބަރު ރޮޒެއިނާ އާދަމް ވިދާޅުވެއްޖެއެވެ.
އިދާރީ ދާއިރާތައް ލާމަރުކަޒީ އުޞޫލުން ހިންގުން ކަށަވަރުކުރުމުގެ ޚާއްޞަ ބިލާއި ގުޅޭ ގޮތުން ރޭ ބޭއްވި މަޖްލީހުގެ ޖަލްސާގައި މަޑުއްވަރީ ދާއިރާގެ މެމްބަރު ވަނީ ބިލާއި ގުޅޭ ގޮތުން ސުޕްރީމް ކޯޓުން ދެއްވާފައިވާ އިސްތިޝާރީ ލަފާއަކީ ސަރުކާރުގެ ދެފެކްޝަނަށް ފަހިވާ ގޮތަށް އަރުވާފައިވާ ލަފާއެއް ކަމަށް ވިދާޅުވެފައެވެ.
އޭނާ ވިދާޅުވީ ސުޕްރީމް ކޯޓުން ދީފައިވާ ލަފާއަކީ "ތުން މެޓައެއް" ކަހަލަ ހުރިހާ ފަރާތެއް ރުއްސާލެވޭ ފަދަ ރަނގަޅު ލަފާއެއް ކަމަށެވެ.
ޝަރީފުގެ ފަހުން ވާހަކަ ދައްކަވަމުން ރޮޒެއިނާ ވިދާޅުވީ އެމްޑީޕީ އަކީ އެއް މަގްސަދެއް ހާސިލް ކުރުމަށް މަސައްކަތް ކުރާ ޕާޓީއެއް ކަމަށާއި، އެމްޑީޕީގައި ދެ ފެކްޝަނެއް ނޯންނާނެ ކަމަށެވެ.
""މަޑުއްވަރީ ދާއިރާގެ އިއްޒަތްތެރި މެންބަރުގެ ކައިރީގައި ދަންނަވާލަން ބޭނުންވަނީ އަޅުގަނޑުމެންގެ ޕާޓީގައި ދެ ފެކްޝަނެއް ނޯންނާނެ އޭ. އެކަމަކު އަޅުގަނޑުމެންނަކީ އަބްދުވެސް ހިޔާލުތަފާތުވީމަ އެކަމާ ވަރަށް ގަދަޔަށް ޒުވާބު ވެސް ކުރާ ބަޔެކޭ،"
ރޮޒެއިނާ މިހެން ވިދާޅުވި ނަމަވެސް ކައުންސިލަރުންގެ ދައުރާއި މެދު ހުށަހެޅިފައިވާ މައްސަލަ އާއި ގުޅިގެން އެމްޑީޕީގެ މެމްބަރުންގެ މެދުގައިވަނީ ދެ ބަސްވުން އުފެދި އެއް ބަޔަކު އަނެއް ބަޔަކަށް ފާޑު ކިޔާފައެވެ.
