އަލްޙަމްދު ލިﷲ! ރާއްޖެއިން ކޮވިޑަށް ޝިފާ ލިބުނު މީހުންގެ އަދަދު 406 އަށް
ރާއްޖެ އިން ކޮވިޑް-19 ޖެހުނު މީހުންގެ ތެރެއިން އިތުރު ފަސް މީހަކު ބަލިން ރަނގަޅު ވެ ބަލިން ރަނގަޅުވި މީހުންގެ ޖުމްލަ އަދަދު 406 އަށް އަރައިފިއެވެ.
މިކަން ޙާމަކޮށްފައިވަނީ އެޗްޕީއޭ އިން ކޮވިޑްގެ މަައުލޫމާތު ހާމަކުރާ ޑޭޝްބޯޑުގައެވެ.
މީގެ އިތުރުން ރޭގައި ވެސް ވަނީ ބަލި ޖެހުނު 14 މީހަކަށް ބަލިން ޝިފާ ލިބިފައެވެ. އޭގެ ތެރޭގައި ތެރޭގައި އަށް އަހަރުގެ ކުއްޖަކާއި ހަތަރު އަހަރުގެ ކުއްޖަކު ވެސް ހިމެނެއެވެ.
ރާއްޖެއިން ކޮވިޑް-19 ޖެހުނު މީހުންގެ ޖުމްލަ އަކީ 1،672 އެވެ. ނަމަވެސް މިވަގުތު އެ ބައްޔަށް ފަރުވާ ހޯދަމުން އަންނަ މީހުންގެ އަދަދު އުޅެނީ 1،264 ގަ އެވެ.
ކޮވިޑް-19 ގައި ރާއްޖެއިން ފަސް މީހަކު ނިޔާވެފައިވެ އެވެ. އެއީ 80 އަހަރުން މަތީގެ ތިން ދިވެހިންނާއި ބަންގްލަދޭޝްގެ ދެ މީހެކެވެ.
ރާއްޖޭގައި ކޮވިޑް-19 ޖެހުނު މީހުންގެ ތެރޭގައި އެންމެ ގިނައީ ބަންގްލަދޭޝްގެ މީހުންނެވެ. އެ ގައުމުގެ 863 މީހުންނަށް ބަލި ޖެހުނުއިރު ދިވެހިންގެ އަދަދު އުޅެނީ 555 ގަ އެވެ. އެ ބަލި އެންމެ ގިނައިން ޖެހިފައިވަނީ 31-40 އަހަރާ ދެމެދުގެ މީހުންނަށެވެ.
