ކޮވިޑާއެކު ނަފްސާނީ މައްސަލަތަކަށް ފަރުވާ ހޯދަން އެދުނު މީހުންގެ އަދަދު 3 ގުނަ އިތުރުވެއްޖެ
ރާއްޖޭގައި ކޮވިޑް ފެތުރެން ފެށުމާއެކު ނަފްސާނީ މައްސަލަތަކަށް ފަރުވާ ހޯދަން އެދުނު މީހުންގެ އަދަދު ތިން ގުނައަށް އިތުރުވެފައިވާ ކަމަށް އައިޖީއެމްއެޗުން ބުނެފި އެވެ.
ރޭ ބޭއްވި ނޫސްވެރިންގެ ބައްދަލުވުމުގައި އައިޖީއެމްއެޗުގެ ސެންޓަ ފޯ މެންޓަލް ހެލްތުގެ ޕްރިންސިޕަލް ކްލިނިކަލް ސައިކޮލޮޖިސްޓް ޑރ. އާފިޔާ އަލީ ވިދާޅުވީ މި އަހަރުގެ މާޗް މަހުން ފެށިގެން މެއި މަހުގެ ނިޔަލަށް 999 މީހުން ނަފްސާނީ ފަރުވާ ހޯދަން އެދުނު ކަމަށާއި އެއާ ހިލާފަށް މިދިޔަ އަހަރުގެ އެ މުއްދަތުގައި ފަރުވާ ހޯދީ 330 މީހުން ކަމަށެވެ.
"ހުށަހެޅުނު މައްސަލަަތަކަށް ބަލާއިރު ވެސް ނުވަތަ އައިޖީއެމްއެޗްގެ ސެންޓަ ފޯ މެންޓަލް ހެލްތަށް ފަރުވާއަަށް އެދިގެން މިދިޔަ ތިން މަސް ތެރޭގައި ފަރުވާއަށް އެދި، އެޕޮއިންޓްމެންޓަށް އެދި އައިސްފައި ހުރި އަދަދު ތިން ގުނަ އިތުރު،" ޑރ. އާފިޔާ ވިދާޅުވި އެވެ
އާފިޔާ ވިދާޅުވީ ރާއްޖޭގައި އަދި ކޮވިޑާ ގުޅިގެން ނަފްސާނީ މައްސަލަތައް އިތުރުވެފައިވާ މިންވަރާއި މައްސަލަތަކުގެ ބާވަތް ދެނެގަންނަން ދިރާސާއެއް ކުރެވިފައެއް ނުވާ ކަމަށެވެ. ނަމަވެސް އެހެން ގައުމުތަކުގައި ކޮވިޑާ ގުޅިގެން އެންމެ ބޮޑަށް ކުރިމަތިވާ ނަފްސާނީ މައްސަލަ އަކީ ޕޯސްޓް ޓްރައުމެޓިމް ޑިސްއޯޑާ ކަމަށް އޭނާ ފާހަގަ ކުރެއްވިއެވެ.
ކޮވިޑާ އެކު ނަފްސާނީ ގޮތުން ވެސް ޕެންޑެމިކެއް (ބޮޑުު ބަލިމަޑުކަމެއް) ކުރިމަތިވާނެ ކަމުގެ ކަންބޮޑުވުން ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ)ގެ މާހިރުން ވެސް ފާޅުކުރައްވަމުން ގެންދަވާ ކަމަށް އޭނާ ވިދާޅުވި އެވެ.
