ކަރަންޓީން ކުރަން އަމިއްލަ އިމާރާތްތައް ސަރުކާރަށް ނެގޭ ގޮތަށް ގަވާއިދު އެކުލަވާލައިފި
ސިއްހީ ނުރައްކަލުގެ ކުއްލި ހާލަތުގައި އޮންނައިރު، ބައްޔައް ޝައްކު ކުރެވޭ މީހުން ކަރަންޓީން ކުރުމަށް އަމިއްލަ އިމާރާތްތައް، ބަދަލު ދޭ ގޮތަށް ދައުލަތާ ހަވާލުކުރަން އެންގުމުގެ ބާރު ސަރުކާރަށް ލިބޭ ގޮތަށް ގަވާއިދެއް އެކުލަވާލައި، އެ ގަވައިދަށް އަމަލުކުރަން ފަށައިފި އެވެ.
ހެލްތު މިނިސްޓްރީން އިއްޔެ އެކުލަވާލާފައިވާ އާންމު ކުރި އެކަހެރި ކުރުމުގެ މަރުކަޒުތަކާއި ކަރަންޓީން ކުރުމުގެ މަރުކަޒުތަކުގެ ގަވާއިދުގައިވާ ގޮތުން ނުރައްކާތެރި ބަލިތަކާ ގުޅިގެން މީހުން ކަރަންޓީން ކުރާނެ މަރުކަޒުތައް ކަނޑައަޅާނީ ހެލްތް މިނިސްޓަރެވެ.
އަދި ސިއްހީ ކުއްލި ނުރައްކަލުގެ ހާލަތުގައި މީހުން ކަރަންޓީން ކުރުމަށް މީހެއްގެ އަމިއްލަ އިމާރާތެއް ކޮންމެހެން ބޭނުންވެއްޖެ ނަމަ، އެތަނެއް ގިނަވެގެން އެއް އަހަރަށް ސަރުކާރާ ހަވާލު ކުރަން އެންގުމުގެ ބާރު މިނިސްޓަރަށް އޮންނާނެ ކަމަށް ގަވާއިދުގައި ބަޔާންކޮށްފައިވެއެވެ. ނަމަވެސް ތަން އެފަދަ ތަންތަން ސަރުކާރުން ބޭނުންކުރާ މުއްދަތަށް ސަރުކާރުން ބަދަލު ދޭންޖެހޭނެ ކަަމަށް ވެސް އެ ގަވާއިދުގައި ހިމަނާފައިިވެއެވެ.
މީގެ އިތުރުންވެސް މީހުން ކަރަންޓީން ކުރުމަށް އިމާރާތެއް ހަވާލު ކުރަން އަންގާ އެންގުމަކަށް އެ ތަނެއްގެ ވެރި ފަރާތުން ދެކޮޅު ހަދައިފި ނަމަ، ތަނެއް ހޯދުމުގެ ކޯޓު އަމުރަކަށް އެދި ސިވިލް ކޯޓަށް ހުށަހެޅިދާނެ ކަމަށް ވެސް އެ ގަވައިދުގައި ބުނެފައިވެއެވެ. އެގޮތަށް އިމާރާތެއް ހޯދަން ޖެހޭނީ އެ ތަނެއްގައި ބަޔަކު ދިރިއުޅޭ ނަމަ، އެ މީހުންނަށް ވަގުތީ ބޯހިޔާވަހިކަމެއް ހަމަޖައްސައި ދިނުމަށް ފަހުގައެވެ. ނަމަވެސް އެގޮތަށް ނަގާ އިމާރާތެއް ސަރުކާރުން ބޭނުން ކުރުމަށް ފަހު، އެ ތަން ބޭނުންކުރި މުއްދަތަށް ބަދަލު ދޭނީ ފިނޭންސް މިނިސްޓަރުގެ ލަފާގެ މަތިންނެވެ.
ސިއްހީ ކުއްލި ނުރައްކަލުގެ ހާލަތުގައި މީހުން ކަރަންޓީން ކުރާ މަރުކަޒުތަކުގައި ހުންނަންޖެހޭ ފެންވަރާއި ލިބެންޖެހޭ ޚިދުމަތްތައް ވެސް އެ ގަވާއިދުގައި ކަނޑައަޅައި ބަޔާންކޮށްފައިވެއެވެ.
