މާލޭގައި ތާށިވެފައިތިބި 360 މީހަކު ކަރަންޓީނަށް ފަހު އަނބުރާ ރަށަށް!
ލޮކްޑައުންއާ ގުޅިގެން މާލޭގައި ތާށިވެފައި ތިބި މީހުންގެ ތެރެއިން އަނބުރާ ރަށަށް ދާން ބޭނުންވެގެން ޓްރާންސިޓް ކަރަންޓީނަށް ގެންދިޔަ 360 މީހުން ރަށަށް ފޮނުވާލައިފިއެވެ.
ސަރުކާރުން ނިންމާފައި ވަނީ މާލޭގައި ތާށިވެފައިތިބި މީހުން ރަށްރަށަށް ފޮނުވުމުގެ ކުރިން ކަރަންޓީން ކުރުމަށެވެ. އެކަމަށް ހަތް ރިސޯޓެއް ވަނީ ހަމަޖައްސައިފަ އެވެ. އެއީ، އައްޑޫ ހެރަތެރެ އާއި ދ. އިރުވެލި ރިސޯޓްގެ އިތުރުން ޅ. ފުށިފަރު ރިސޯޓާއި ރ. ފުރަވެރި ރިސޯޓާއި ހދ. ހޮނޑާފުއްޓާއި ފ. ފިލިތެޔޮ އަދި މ. މެދުފުއްޓެވެ.
ސަރުކާރުން ހާމަކޮށްފައިވާ ގޮތުގައި މިހާތަނަށް އައިރު ޓްރާންސިޓް ކަރަންޓީން ފެސިލިޓީއަށް 2700 އަށްވުރެ ގިނަ މީހުން ވަނީ ގެންގޮސްފައެވެ.
ރޭ ބޭއްވި ނޫސްވެރިންގެ ބައްދަލުވުމުގައި ކޮވިޑް-19ގެ ތަރުޖަމާނު މަބްރޫކް އަޒީޒް ވިދާޅުވީ، މާލޭގައި ހިންގަމުންދާ ފުރަބަންދަށް ލުއި ދިނުމާއިއެކު ޓްރާންސިޓް ކަރަންޓީނަށް ގެންދާ މީހުންގެ މަސައްކަތް އަވަސް ވެފައިވާކަމަށާއި އެގޮތުން މިހާތަނަށް އައިރު ޓްރާންސިޓް ކަރަންޓީންތަކަށް 2711 މީހުން ގެންގޮސްފައިވާކަމަށެވެ. އެގޮތުން އިއްޔެ އެކަނިވެސް 94 މީހުން ޓްރާންސިޓް ކަރަންޓީން ފެސިލިޓީއަށް ގެންގޮސްފައިވާކަމަށް އޭނާ ވިދާޅުވިއެވެ.
މި ފެސިލިޓީތަކުން މީހުން އަނބުރާ ރަށަށް ދިއުމުގެ ހުއްދަ ދެނީ 14 ދުވަހު ކަރަންޓީން ވުމަށް ފަހު ކޮވިޑަށް ޓެސްޓްކޮށް ނަތީޖާ ނައްސިވުމުންނެވެ. އެގޮތުން މިހާތަނަށް އައިރު މި ޕްރޮސީޖަރ ފުރިހަމަ ކުރުމަށް ފަހު 360 މީހުން ފޮނުވާލާފައިވާކަމަށް މަބްރޫކް ވިދާޅުވިއެވެ،
"ޓްރާންސިޓް ކަރަންޓީން ފެސިލިޓީއަށް ބަލާލާއިރު މިހާތަނަށް އައިރު 2711 މީހުން ވަނީ ގެންގޮސްފައި. އިއްޔެ 94 މީހުން ވަނީ ގެންގޮސްފައި. 14 ދުވަސް ހަމަކޮށް 360 މީހަކު މި ފެސިލިޓީތަކުން ވަނީ ފޮނުވާލާފައި، އެއްވެސް މީހަކު މިތަނުން ފައްސިއެއް ނުވޭ" މަބްރޫކް ވިދާޅުވިއެވެ.
ރަށްރަށަށް ނުދެވިގެން 5،000 މީހުން ރަޖިސްޓްރީކޮށްފައިވާ ކަމަށް ޓޫރިޒަމް މިނިސްޓަރު އަލީ ވަހީދު ވަނީ ކުރިން ވިދާޅުވެފަ އެވެ. އެކަމަށް ހައްލެއް ހޯދައި އަތޮޅުތެރެ އަށް މީހުންނަށް ފުރޭނެ އުސޫލެއް ކަނޑައަޅާފައިވެ އެވެ. އެ އުސޫލުގައިވާ ގޮތުން އެންމެ ފުރަތަމަ އިސްކަން ދޭނީ އާސަންދަ އާއި އެންސްޕާގެ އެހީގައި ބޭސްފަރުވާ އަށް މާލެ އައިސް އެނބުރި ރަށަށް ދެވޭނެ ގޮތެއް ނެތިފައި ތިބި މީހުންނަށެވެ.
Ads by STO
