ބްރެޒިލް ރޮނާލްޑޯއަށްވެސް އެންމެ މޮޅީ މެސީ
ދުނިޔޭގައި އުފެދުނު އެންމެ މޮޅު އެއް ފޯވާޑަކީ ބްރެޒިލްގެ ރޮނާލްޑޯއެވެ. އޭނާއަކީ ފުޓްބޯޅައިގެ އެތައް ރެކޯޑްތަކެއް ހެދި ކުޅުންތެރިއެކެވެ. އަނިޔާގެ ހިޔަނި ކެރިއަރަށް އެޅުނު ނަމަވެސް ދުނިޔޭގެ މޮޅު ކުޅުންތެރިޔާގެ މަގާމް ރޮނާލްޑޯ ދެ ފަހަރު ހޯދިއެވެ.
ދުނިޔޭގައި މިވަގުތު ހުރި އެންމެ މޮޅު ކުޅުންތެރިއަކީ ކާކުތޯ ކުރާ ސުވާލަށް ރޮނާލްޑޯވެސް މިވަނީ އޭނާގެ ހިޔާލު ހާމަކޮށްފައެވެ. ސްޕެއިންގެ ނޫހަކުން ކުރި ސުވާލަށް ޖަވާބުދެމުން އޭނާ ބުނީ މި ޖީލުގެ ކުޅުންތެރިންގެ ތެރެއިން އެންމެ މޮޅީ މެސީކަމަށެވެ. އަދި މެސީ ކަހަލަ ކުޅުންތެރިއެއް ފެންނަނީ އަބަދުވެސް 30 ނުވަތަ 40އަހަރުން އެއް ފަހަރުކަމަށްވެސް އޭނާ ބުންޏެވެ.
މެސީގެ އިތުރުން ދެން އެންމެ މޮޅީ ކޮން ކުޅުންތެރިންނެއްތޯ އެހުމުން ރޮނާލްޑޯ ބުނީ ލިވަޕޫލްގެ ފޯވާޑް މުހައްމަދު ސަލާ، ބެލްޖިއަމްގެ އެޑެން ހަޒާޑްގެ އިތުރުން ބްރެޒިލްގެ ނޭމާ އަދި ކިލިއަން އެއްބާޕޭ ކުޅޭތަން ވަރަށް ގިނައިން ބަލާކަމަށެވެ. އަދި މި ހަތަރު ކުޅުންތެރިންވެސް ވަރަށް މޮޅުކަމަށެވެ. އެމްބާޕޭއަކީ ރޮނާލްޑޯއާއި ވަރަށް އެއްގޮތް ކުޅުންތެރިއެއްކަމަށް ތަޖުރިބާކާރުން ދެކެއެވެ. މިކަމާއި ގުޅޭގޮތުން ރޮނާލްޑޯ ބުނީ ކުޅުންތެރިން އަޅާކިޔުމަކީ އެހާ ރަނގަޅުކަމެއް ނޫންކަމަށާއި، އެކި ދައުރުގެ ކުޅުންތެރިން ކުޅުނު ހާލަތާއި ވަސީލަތްތައްވެސް ތަފާތުކަމަށެވެ. އެހެންކަމުން ޕެލޭއާއި މެރަޑޯނާ ފަދަ ކުޅުންތެރިންނާއި، މިހާރުގެ ކުޅުންތެރިން އަޅާ ނުކިޔޭނެކަމަށެވެ.
ދުނިޔޭގައި އުފެދުނު އެންމެ މޮޅު އެއް ފޯވާޑް ، ބްރެޒިލްގެ ރޮނާލްޑޯގެ ލިސްޓުން ކްރިސްޓިއާނޯ ރޮނާލްޑޯއަށް ޖާގަ ނުލިބުމަކީ ވަރަށް ބޮޑު ހައިރާންކަމެކެވެ. ސަބަބަކީ މިދިޔަ 15 އަހަރުވެސް ދުނިޔޭގެ މޮޅު ކުޅުންތެރިޔާގެ މަގާމަށް ވާދަކުރާ ލިސްޓުގެ ކުރީގައި ޕޯޗުގަލްގެ ކެޕްޓަން ރޮނާލްޑޯ ހިމެނިފައިވުމެވެ.
Ads by STO
