މާފުށީ ޖަލާއި އައްސޭރި ޖަލު އެލާޓްކޮށްފައި އޮތްއޮތުން ނިމުމަކަށް ގެނެސް ލުއިތަކެއް ދީފި
ކޮވިޑް19 ގެ ސަބަބުން ކ. މާފުށީ ޖަލާއި ކ. ހިންމަފުށީގައި ހުންނަ އައްސޭރި ޖަލު އެލާޓު ކޮށްފައި އޮތް އޮތުން ނިމުމަކަށް ގެނެސްފިއެވެ.
މޯލްޑިވްސް ކަރެކްޝަނަލް ސާވިސް އިން ވަނީ ކޮވިޑް19 އާ ގުޅިގެން ކަރެކްޝަންސްގެ ބެލުމުގެ ދަށުގައި ތިބި ގައިދީންނާއި ބަންދުމީހުން އަދި އޮފިސަރުންނާއި މުވައްޒަފުންގެ ރައްކާތެރިކަމަށްޓަކައި އަޅާފައިވާ ފިޔަވަޅުތަކަށް ލުއިތަކެއް ދިނުމަށް ނިންމާ އެކަމާއި ގުޅޭ އުސޫލެއް އެކުލަވާލައިފައެވެ.
ކަރެކްޝަންސް އިން ބުނީ ލުއިތައް ދިނުމަށް ހަމަޖެހިފައިވަނީ މަރުހަލާތަކަކަށް ބަހާލައިގެން ކަމަށެވެ. ފުރަތަމަ މަރުހަލާ ފެށިގެން ދާނީ މާލެ ފުރަބަންދު ކޮށްފައި އޮތް އޮތުމަށް ނިމުމަކަށް އައުމުން ނުވަތަ އެކަމަށް ލުއިތަކެއް ދިނުމަށް ނިންމާ ހިސާބުންނެވެ. ދެވަނަ މަރުހަލާ އަށް ދާނީ އެއްރަށުން އަނެއް ރަށަށް މީހުން އަރާ ފޭބުން ހުޅުވާލުމުންނެވެ. އަދި ތިންވަނަ މަރުހަލާ އަށް ދާނީ މިހާރު އިއުލާން ކޮށްފައިވާ ސިއްހީ ކުއްލި ނުރައްކަލުގެ ހާލަތު ނިމުމަކަށް ގެންނަ ހިސާބުން ކަމަށް މޯލްޑިވްސް ކަރެކްޝަންސް ސާވިސަސް އިން ބުންޏެވެ.
މާލެ ޖަލާއި ހުޅުމާލެ ޖަލު އެލާޓްކޮށްފައި އޮތް އޮތުމަށް އަދި ނިމުމެއް ގެނެސްފައެއް ނުވެއެވެ. ކަރެކްޝަނަލް ސާވިސް އިން ބުނި ގޮތުގައި މާލެ ޖަލާއި ހުޅުމާލެ ޖަލު އެލާޓްކޮށްފައި އޮތް އޮތުމަށް ނިމުމެއް ގެންނާނީ ދެ ވަނަ މަރުހަލާ އިން ފެށިގެންނެވެ.
ފިޔަވަޅުތަކަށް ލުއި ދިން ނަމަވެސް، ޖަލުގައި ތިބި ފަރާތްތަކުގެ ރައްކާތެރިކަން ކަށަވަރުކުރުމަށްޓަކައި މިހާރުވެސް އަޅަމުންދާ ގިނަ ފިޔަވަޅުތައް މެދު ކެނޑުމެއްނެތި ކުރިއަށް ގެންދާނެ ކަމަށް ކަރެކްޝަނުން ބުނެއެވެ.
ޖަލުން ނުވަތަ ޖަލު ހުރި ރަށަކުން ކޮވިޑް19 އަށް ޕޮޒިޓިވް ވެފައިވާ މީހެއް ފެނިއްޖެ ނަމަ ނޫނީ އެ ރަށެއް މޮނީޓަރިން ހާލަތަށް ގެނެވިއްޖެ ނަމަ، ސަރުކާރުން އަޅާ ފިޔަވަޅުތައް ރިއާޔަތްކޮށް، ޖަލުގެ އެލާޓް ލެވެލް އަށް ބަދަލު ގެނެސް ލުއި ދިނުމުގެ މަރުހަލާތައް މެދު ކަނޑާލެވޭނެ ކަމަށް ވެސް ކަރެކްޝަންސް އިން ބުންޏެވެ.
