މަހުލޫފް އަކީ ކަޅު ނަސްލުގެ މީހެއް: އަނބިކަނބަލުން
މިނިސްޓަރ އަހްމަދު މަހުލޫފް އަކީ ކަޅު ނަސްލުގެ މީހެއް ކަމުގައި މަހުލޫފުގެ އަނބިކަނބަލުން ނަޒޫ ނަސީމް ވިދާޅުވެއްޖެއެވެ.
ނަޒޫ މިހެން ވިދާޅުވީ މިނިސްޓަރު މަހްލޫފް އޭނާގެ ދަރިކަނބަލުންގެ އިސްތަށިގަނޑު ގަތާ ވީޑިއޯ އެއް އާންމު ކުރައްވާފައި "ބްލެކްލައިވްސްމެޓަރ" އެ ހޭޝްޓެގް ބޭނުން ކުރެއްވުމުން އަމާޒުވި ފާޑުކިޔުންތަކަށް ރައްދު ދެއްވަމުން ކުރެއްވި ޓްވީޓެއްގައެވެ. ފާޑިކިޔުން ތައް އަމާޒުވުމާއެކު މަހުލޫފް ވަނީ އެ ޓްވީޓު ޑިލިޓުކޮށް ހޭޝްޓެގާއި ނުލާ އަލުން ޕޯސްޓުކޮށްފައެވެ.
މި ފާޑުކިޔުން ތަކާއެކު މަހުލޫފް ވަނީ އޭނާގެ ކާފަ އަކީ އެފްރިކާ މީހެއް ކަމުގައި ވެސް ވިދާޅުވެފައެވެ.
އެގޮތުން މީހަކު މަހުލޫފް އެ ހޭޝްޓެގް އާއެކު ކުރެއްވި ޓްވީޓު ޑިލިޓުކޮށްލެއްވީ ކީއްވެތޯ ސުވާލުކުރެއްވުމުން ނަޒޫ ވިދާޅުވީ އެއީ މަހުލޫފު މާ ބޮޑު ވިސްބުމެއް ނެތި ކުރެއްވި ކަމެއް ކަމަށެވެ. އަދި މަހުލޫފް އަކީ ހަގީގަތުގައި ވެސް "ކަޅު" މީހެއް ކަމުގައި ނަޒޫ ވިދާޅުވިއެވެ.
އަދި މަހުލޫފް އަކީ ކިހާ "ކަޅު" މީހެއް ކަން ކިޔައިދެން އޭނާ ނުޖެހޭނެ ކަމަށާއި އެ މީހަކު އަމިއްލައަށް މަހުލޫފު އަކީ ކިހާ "ކަޅު" މީހެއް ކަން ގަބޫލު ކުރުމަށް އޭނާ ވަނީ އެދިފައެވެ.
ފާޑުކިޔުން ތަކާއެކު ނަޒޫ ވެސް ވަނީ މި ޓްވީޓުތައް ޑިލިޓުކޮށްލާފައެވެ.
"ބްލެކްލައިވްސްމެޓަރ" އަކީ އެމެރިކާގައި ކަޅު ނަސްލުގެ މީހުންނަށް ކުރިމަތިވާ ތަފާތު ކުރުމާއި، ތަފާތު އެހެނިހެން އަނިޔާތަކަށް ހޭލުންތެރި ކުރުމުގެ ގޮތުން ފެށިގެން އައި ކެމްޕޭނެކެވެ. މިދުވަސް ކޮޅު އެ ހޭޝްޓެގު އަނެއްކާ ބޭނުން ކުރަމުން އަންނަނީ، އެމެރިކާގައި ފުލުހުންގެ ބަޔަކު ކަޅު ނަސްލުގެ މީހަކު މަރާލުމާއި ގުޅިގެންނެވެ.
