އިޒްމިއާ މަގާމުން ދުރުކުރީ އިދާރީ ބަދަލުތަކެއްގެ ތެރެއިން: ފުލުހުން
ފުލުހުންގެ ތަރުޖަމާނަކަށް ހުރި ޗީފް އިންސްޕެކްޓާ އޮފް ޕޮލިސް އިޒްމިއާ ޒާހިރު އެ މަގާމުން ވަކިކޮށްފިއެވެ.
އަދި އެމަގާމު ވަނީ ވަގުތީ ގޮތުން ޗީފް ސްޕްރިޑެންޓް އޮފް ޕޮލިސް ޔޫނުސް ސޮބާހު އާ ހަވާލުކޮށްފައެވެ.
ފުލުހުން ވަނީ މިހާރު މިކަން ހުރިހާ މީޑިއާތަކަށް އަންގާފައިވާއިރު ފުލުހުން މީޑިއާތަކަށް ފޮނުވި މެސެޖްގައި ބުނެފައިވަނީ، މިއަދުން ފެށިގެން ފުލުހުންގެ އިސް ތަރުޖަމާނަކަށް ވަގުތީގޮތުން ޔޫނުސް ސޮބާހު ހަމަޖައްސަވާފައިވާ ކަމަށެވެ. އަދި މި ބަދަލާއެކު ޕޮލިސް މީޑިއާ ރިލޭޝަން އޮފިސަރުގެ ހައިސިއްޔަތުން ދުވަހުން ދުވަހަށް މީޑިއާތަކަށް މައުލޫމާތު ދިނުމުގައި ހަރަކާތްތެރިވާނީ ޕޮލިސް ޗީފް ސްޓޭޝަން އިންސްޕެކްޓާ އާތިފާ ހަސަން ކަމަށް އެ މެސެޖުގައި ބުނެފައިވެއެވެ.
ފާއިތުވީ ދޮޅު އަހަރެއްހާ ދުވަހު ފުލުހުންގެ ތަރުޖަމާނުގެ މަގާމާ ހަވާލުވެ ހުންނެވި ޗީފް އިންސްޕެކްޓާ އޮފް ޕޮލިސް އިޒްމިއާ ޒާހިރަށް ނޫސްވެރިން ދެއްވި އެއްބާލުމަށާއި ބެހެއްޓެވި ގާތްކަމަށްޓަކައި ފުލުހުން މީޑިއާތަކަށް ފޮނުވާފައިވާ މެސެޖްގައި ޝުކުރު އަދާކޮށްފައިވެއެވެ.
އޭގެ އިތުރުން ވެސް އެ މެސެޖުގައި ފާއިތުވީ ދުވަސްތަކުގައި ފުލުހުންނާއި މީޑިއާތަކާ ދެމެދު އޮންނަ ގުޅުން ހަރުދަނާކޮށް އިޒްމިއާ މަސައްކަތް ކުރި ކަން ފާހަގަކޮށް އެ މަސައްކަތައް އޭނާއަށް ޝުކުރު ދަންނަވާފައިވެއެވެ.
ސިންގަޕޫރު ނޭޝަނަލް ޕޮލިސް އެކަޑެމީން ޑިގްރީ އަދި އޮސްޓްރޭލިއާގައި ޕީސް އެންޑް ކޮންފްލިކްޓް ސްޓަޑީޒް އިން މާސްޓާސް ޑިގްރީ ހާސިލްކުރައްވައިފަވާ އިޒްމިއާ ފުލުހުންގެ ތަރުޖަމާނަކަށް ހަމައްޖައްސާފައިވަނީ، ޑިސެމްބަރު 19، 2018 ގައެވެ.
