އަޅުގަނޑު އަދި ކޮވިޑަށް ޓެސްޓެއް ނުކުރަން، ދޮގު މައުލޫމާތު ނުފެތުރުމަށް ދަންނަވަން: ޑރ. މޫސަ
ކޮވިޑް-19 އަށް ފައްސިވާ މީހުންނަށް ފަރުވާކުރުމުގައި ހަރަކާތްތެރިވެވަޑައިގަންނަވާ އައިޖީއެމްއެޗުގެ ޕުލްމޮނޮލޮޖިސްޓު ޑރ. މޫސާ ހުސެއިން ބައްޔަށް ފައްސިވި ކަމަށް ފެތުރި ވާހަކަ އޭނާ މިރޭ ދޮގު ކުރައްވައިފި އެވެ.
މީސް މީޑިއާގައި ދައުރުވަމުން އަންނަ މައުލޫމާތުގައި ވާގޮތުން ޑރ. މޫސަ ކޮވިޑަށް ފައްސިވިކަން އެނގުނީ އެޗްޕީއޭއިން ހެދި އެންޓިބޮޑީ ޓެސްޓުން ކަމަށާއި އޭރު އޭނާ ބަލިން ރަނގަޅުވެފައިވާ ކަމަށެވެ
މިކަން ދޮގު ކުރައްވާ ޑރ. މޫސަ ވިދާޅުވ އެންޓިބޮޑީ ޓެސްޓެއް އަދި ކޮވިޑް ޓެސްޓެއް ވެސް އޭނާ ނުކުރައްވާ ކަމަށެވެ.
ޑރ. މޫސަ ވިދާޅުވީ އޭނާ ފައްސިވިކަމަށް ބުނެ ފޮޓޯއާ އެކު ޓުވިޓާ އާއި ފޭސްބުކްގައި އާއްމުކުރި ޕޯސްޓުތައް މިހާރުން މިހާރަށް ނެގުމަށް އެދޭ ކަމަށާއި މީސް މީޑިއާގައި ދޮގު މައުލޫމާތު ނުފެތުރުމަށް ގޮވާލާ ކަމަށެވެ.
"އަޅުގަނޑާ ގުޅުން ހުރިކަމެއްގައި މީޑީއާތަކަށް އަޅުގަނޑު އަމިއްލައަށް މައުލޫމާތު ދޭނަން. އަޅުގަނޑު ގޮވާލަނީ މީސް މީޑިއާ ރަނގަޅު ގޮތުގައި ބޭނުންކޮށް ދޮގު މައުލޫމާތު ފެތުރުން ހުއްޓުވުމަށް. ހާއްސަކޮށް އެމީހުންނާއި އެ މީހުންގެ މަސައްކަތާ ގުޅޭ ގޮތުން." ޑރ. މޫސަ ވިދާޅުވިއެވެ.
