އާ އަހަރު ފާހަގަ ކުރަން އަނަންޔާ ޕާންޑޭ އިޝާންއާއެކު ރާއްޖޭގައި
ލޯބީގެ ގޮތުން ގުޅިގެން އުޅޭކަމަށް އަޑުތައް ފެތުރިފައިވާ ބޮލީވުޑްގެ އެކްޓަރުން ކަމަށްވާ އަނަންޔާ ޕާންޑޭ އާއި އިޝާން ޚާތީރް، އާ އަހަރު ފާހަގަ ކުރުމަށް ރާއްޖެ އަތުވެއްޖެއެވެ.
އަނަންޔާގެ އިންސްޓަގްރާމުން އެނގޭ ގޮތުގައި އެމީހުން ރާއްޖޭގައި ޗުއްޓީ ހޭދަ ކުރަނީ ސަން ސިޔާމް އިރުވެލި ރިސޯޓުގައެވެ. އޭނާ ވަނީ ބިކިނީ ލައިގެން ޕޫލެއް ހުރެ ކައިރީ ބާގަރ އެއް ކަމުން ނަގާފައިވާ ފޮޓޯއެއް ވެސް އިންސްޓަގްރާމް ގައި ހިއްސާ ކޮށްފައެވެ.
ރިޕޯޓުތަކުން ބުނާ ގޮތުގައި އަނަންޔާ އާއި އިޝާން ރާއްޖެ އައިސްފައިވަނީ މިއަދު ހެނދުނުގެ ވަގުތެއްގައެވެ. އެދެމީހުން ރާއްޖެ އަންނަން މުމްބައި އެއާޕޯޓުގައި ތިއްބާ އިންޑިއާގެ ބައެއް ނޫސްތަކުން ވެސް ވަނީ ފޮޓޯ ނަގާފައެވެ. އަދި ރިޕޯޓު ތަކުން ބުނެފައިވަނީ އެ ދެ ތަރިން ވެސް ރާއްޖެ އައިސްފައި މިވަނީ އާ އަހަރު ފާހަގަ ކުރުމަށާއި ރާއްޖޭގައި ޗުއްޓީ ހޭދަ ކޮށްލުމަށް ކަމަށެވެ.
ފިލްމު "ޚާލީ ޕީލީ" ގައި މި ދެ ތަރިން މަސައްކަތް ކުރުމަށްފަހު އެއްކޮށް ވަރަށް ގިނައިން ފެންނާތީ، ދެ ތަރިންގެ މެދުގައި މިހާރު ލޯބީގެ ގުޅުން އޮންނަ ކަމަށް އަޑުތައް ވަރަށް ބޮޑަށް ފެތުރިފައި ވެއެވެ. މި ދެ ތަރިން އެކުގައި "ފޯން ބޫތު" ނަމަކަށް ކިޔާ ފިލްމަކުން ވަރަށް އަވަހަށް ފެނިގެން ދާނެ ކަމަށް ވެސް ރިޕޯޓުތަކުން ބުނެފައިވެއެވެ.
