ރާއްޖޭގައި ކޮވިޑް ޖެހޭ ކުދިންގެ އަދަދު އެހެން ގައުމުތަކަށްވުރެ ގިނަ
ރާއްޖޭގައި ކޮވިޑް-19 ޖެހޭ ކުޑަކުދިންގެ އަދަދު އެހެން ގައުމުތަކާ އަޅާބަލާއި ނިސްބަތުން ގިނަ ކަމަށް އައިޖީއެމްއެޗުގެ ކުޑަކުދިންގެ ޑޮކްޓަރު އަހުމަދު ފައިސަލް ވިދާޅުވެއްޖެ އެވެ.
ރާއްޖޭގައި ކޮވިޑް ޖެހުނު ކުޑަކުދިންގެ އަދަދު މިހާރު ވަނީ 100 އަށް ވުރެ މައްޗަށް އަރާފަ އެވެ.
ފައިސަލް މިއަދު ކުރެއްވި ޓްވީޓެއްގައި ވިދާޅުވީ އެހެންގައުމުތަކާ ބަލާއިރު ނިސްބަތުން ކުޑަކުދިންގެ އަދަދު ގިނަ ކަމަށެވެ. އެގޮތުން މިހާތަނަށް ހޮސްޕިޓަލުގައި ބޭއްވީ ދެ ކުދިން ކަމަށާއި އެ ދެ ކުދިންނަކީ ވެސް އަށް މަސް ނުފުރޭ ކުދިން ކަމަށް އޭނާ ވިދާޅުވި އެވެ.
ފައިސަލް ވިދާޅުވީ އެދެކުދިންގެ ފަރާތުން ރޯގާގެ އަލާމާތްތައް ފެނިފައިނުވާ ކަމަށެވެ. ނަމަވެސް އެއް ކުއްޖަކު ހުން ހުރި ކަމަށާއި ހޮޑުލާ ބޭރަށް ހިންގި ކަމަށެވެ. އެދެކުދިންވެސް ކޮވިޑަށް ޕޮޒިޓިވް ވެފައިވަނީ އާއިލާއާއެކު ކަމަށެވެ. އެދެކުދިންގެ ހާލުވެސް މިހާރު ރަނގަޅު ކަމަށް އޭނާ ވިދާޅުވި އެވެ.
ރާއްޖޭން ކޮވިޑަށް ޕޮޒިޓިވްވި އެންމެ ހަގު ކުއްޖާގެ އުމުރަކީ 11 ދުވަހެވެ. މީގެ އިތުރުން ދެ އަހަރުން ދަށުގެ 6 ކުއްޖަކަށްވެސް ވަނީ ކޮވިޑް ޖެހިފަ އެވެ.
ރާއްޖޭގައި ދުވާލެއްގެ މައްޗަށް އާންމު ގޮތެއްގައި 30 އަށް ވުރެ ގިނަ ކޭސް ފެނެ އެވެ. މިހާތަނަށް، 1،800 އަށް ވުރެ ގިނަ މީހުންނަށް ވަނީ މި ބަލި ޖެހިފަ އެވެ. އޭގެ ތެރޭގައި އެންމެ ގިނައީ ބަންގުލަދޭޝްގެ ރައްޔިތުންނެވެ. އަދި ބަލިން ރަނގަޅުވި މީހުންގެ އަދަދު ވަނީ 600 އަށްވުރެ މައްޗަށް އަރާފަ އެވެ.
