މާލޭގެ ފިހާރައަކުން ވައްކަންކުރި މީހެއްގެ ވީޑިއޯ އާއްމުކޮށްފި
މާލޭގެ ފިހާރައަކުން މީހަކު ވައްކަން ކުރާ މަންޒަރު ދައްކުވައިދޭ ވީޑިއޯއެއް އާއްމުވެއްޖެއެވެ.
އެނގިފައިވާ ގޮތުގައި ވައްކަން ކޮށްފައިވަނީ ރާއްޖޭގައި ފުޅާ ދާއިރާއެއްގައި ވިޔަފާރި ކުރަމުންދާ ކުންފުންޏެއްގެ ފިހާރައަކުންނެވެ.
ވީޑިއޯއިން ފެންނަ މީހާ އެފިހާރައިން ވައްކަން ކޮށްފައިވަނީ އިއްޔެ ރޭކަން ވެސް އެނގިފައިވެއެވެ.
އާއްމުކޮށްފައިވާ ވީޑީއޯއިން ފެންނަނީ ރަތް ކުލައިގެ ޓީޝާޓެއް ލައިގެން ހުރި ފިރިހެނަކު، ހަރެއް ކައިރީގައި މަޑު ކޮށްގެން އެތަނުގައި ބަހައްޓާފައި ހުރި ސާމާނަށް ބަލަން ހުރި މަންޒަރެވެ. އޭނާގެ ކައިރީގައި ފުރަތަމަ އެހެން ކަސްޓަމަރުން ތަކެއް ވެސް ވިޔަފާރިކުރަން އުޅޭ މަންޒަރު ފެނެއެވެ. އެހެން ކަސްޓަމަރުން ދިޔުމުން އެމީހާ ވަނީ ހަރުން ސެންޓު ފުޅިއެއް ނަގައި، އޭނާގެ ޖިންސުގެ ޖީބު ތެރެއަށް ލާފައެވެ.
އެފިހާރައިން ވައްކަން ކުރި މީހާ ހަމަ އެރޭ ވަނީ އަތުލައިގެންފައެވެ. ނަމަވެސް އޭނާ ވައްކަން ކުރި މަންޒަރު ފެންނަ ވީޑިއޯ އާންމު ކުރީ ފަހުންނެވެ. ވައްކަން ކުރި މީހާއާމެދު ފަހުން ކަންތައް ކުރި ގޮތެއް ފިހާރާއިން ހާމަ ކޮށްފައެއް ނުވެއެވެ.
ބައެއް ވިޔަފާރިވެރިން ބުނާ ގޮތުގައި ފިހާރަތަކުން ވައްކަން ކުރުމުގެ މައްސަލަ ވަނީ ވަރަށް ބޮޑު ވެފައެވެ. އަދި ގިނަ ފަހަރަށް ވަގު އަތުލައި، ފުލުހުންނާ ހަވާލު ކުރި ނަމަވެސް ކުރިއެރުމެއް ނުލިބޭ ކަމަށް ވެސް އެމީހުން ވަނީ ފާހަގަ ކޮށްފައެވެ. ވިޔަފާރިވެރިން ބުނާ ގޮތުގައި، ވައްކަން ކޮށްގެން ހައްޔަރު ކުރާ މީހުންގެ މައްސަލަތައް ބައެއް ފަހަރު ކޯޓާ ހަމައަށް ވެސް ނުދާކަން ވަނީ ފާހަގަ ކޮށްފައެވެ. އަދި މިފަދައިން ފިހާރަތަކުން ވައްކަން ކުރުމުގައި ގިނަ ފަހަރަށް ހަރަކާތްތެރި ވަނީ އެއް ބައެއްކަން ވެސް އެމީހުން ފާހަގަ ކޮށްފައިވެއެވެ.
