ކޮވިޑްގެ ގައިޑްލައިންތަކާ ޚިލާފުވުމުން އަރްބާޒް ޚާނަށާއި ސުހެއިލް ޚާނަށް ފިޔަވަޅު އަޅައިފި
މުމްބައި: ކޮވިޑް-19ގެ ގައިޑްލައިން ތަކާ ޚިލާފު ވުމުން ބޮލީވުޑް ގެ އެކްޓަރ/ޕްރޮޑިއުސަރ ސުހެއިލް ޚާނާއި އަރްބާޒް ޚާނަށް ފިޔަވަޅު އަޅައިފިއެވެ.
ބްރައިހަމް މުމްބައި މުނިސިޕަލް ކޯޕަރޭޝަން (ބީއެމްސީ) އަށް މީހަކު ކޮށްފައިވާ ޝަކުވާއަކާ ގުޅިގެން އަރްބާޒްއާއި ސުހެއިލް އަދި އޭނަގެ ދަރިފުޅު ނިރްވާން ޚާން އިއްޔެއިން ފެށިގެން ވަނީ ތާޖް ލޭންޑްސް އެންޑް ހޮޓަލުގައި ކަރަންޓީނު ކޮށްފައެވެ.
އެމީހުންނާ ބެހޭގޮތުން ޚާރް ޕޮލިސް ސްޓޭޝަނަށް ބަޔަކު މައްސަލަ ހުށަހަޅާފައި ވަނީ މިދިޔަ ޑިސެމްބަރު މަހުގެ 25 ވަނަ ދުވަހު ދުބާއީ އިން އެނބުރި ޤައުމަށް ދިޔުމުން، ހޮޓަލެއްގައި ކަރަންޓީނުވާން އެންގުމުންވެސް، އަމުރަށް ކިޔަމަންނުވެ އެނބުރި ގެއަށް ދިޔުމުންނެވެ.
އިންޑިއާ ގެ ހެލްތު މިިނިސްޓްރީން މިހާރު އާއްމުކޮށްފައިވާ ޤަވާއިދުގައި ބުނެފައިވާ ގޮތުގައި، ޔޫރަޕް، ޔޫއޭއީ އަދި އިނގިރޭސިވިލާތަށް ޒިޔާރަތް ކޮށް އެނބުރި އިންޑިއާ އަށްދާ މީހުން، ހަތް ދުވަހުގެ މުއްދަތަކަށް ކަރަންޓީނު ވާން ޖެހެއެވެ. އެމިނިސްޓްރީން މިފިޔަވަޅުތައް އަޅަން ފަށާފައި ވަނީ އިނގިރޭސިވިލާތުގައި މިހާރު ހަލުވިކަމާއެކު ފެތުރެމުންދާ ކޮވިޑް-19 ގެ އާ ވޭރިއަންޓުގެ ސަބަބުންނެވެ.
ރިޕޯޓުތަކުން ބުނާ ގޮތުގައި ސުހެއިލް ޚާނާއި އަރްބާޒް ޚާން އެހޮޓަލުގައި ކަރަންޓީނަށް މަޑުކޮށްފައިވަނީ އެންމެ ދުވަހަކު އެވެ. އެއަށްފަހު އެނބުރި ގެއަށް ދިޔުމުން އެމީހުންނާމެދު ފިޔަވަޅު އަޅައިދޭން އެދި ބަޔަކު މައްސަލަ ޖެއްސުމުން އެމީހުންނަށް އިންޒާރުދީ މިހާރު ވަނީ އަނބުރާ ކަރަންޓީނަށް ގެންގޮސްފައެވެ.
