ފަޅު ރަށެއްގައި ހުރި މީހަކު ކޮވިޑަށް ފައްސިވުމުން ފަރުވާއަށް ލ.ގަމަށް
ކުނަހަންދޫ ކައިރީގައި އޮންނަ ކުޑަފުށި ކިޔާ ފަޅުރަށެއްގައި ހުރި މީހަކު ކޮވިޑް-19 އަށް ފައްސި ވެއްޖެއެވެ. މިމީހާ ގައިން ކޮވިޑް-19 ގެ އަލާމާތްތައް ފެނުމުން، ގަމުގައި ހުންނަ ކޮވިޑް-19 ފެސިލިޓީއަށް ގެންގޮސް ޓެސްޓް ކުރި ކުރުމުން އެމީހާ ކޮވިޑަށް ފައްސިވެފައިވާ ކަމަށް ޓެސްޓް ނަތީޖާއިން ވަނީ ދައްކާފައެވެ.
ގަމު ކައުންސިލުގެ ނައިބު ރައީސް އަހުމަދު ޝާހީން "ދެން" އަށް މައުލޫމާތު ދެއްވަމުން ވިދާޅުވީ، ކޮވިޑަށް ފައްސިވެފައި ވަނީ ސުޕްރީމް ކޯޓުގެ ކުރީގެ ގާޒީ މުޖުތާޒް ފަހުމީ ކަމަށެވެ. އޭނާ ފައްސިވީ މިމަހުގެ 3 ވަނަ ދުވަހު ކަމަށް ވެސް ޝާހީން ވިދާޅުވިއެވެ.
"ކުނަހަންދޫ ކައިރީގައި އޮންނަ ކުޑަފުށި ކިޔާ ފަޅުރަށެއްގައި އެބޭފުޅާ ހުރީ. އެރަށުގައި ހުއްޓާ އަލާމާތްތައް ފެނިގެން ސާމްޕަލް ނަގާ ޓެސްޓު ކުރިއިރުގައި ކޮވިޑަށް ފައްސި ވެފައިވަނީ. އޭނާ ފައްސި ވެފައި ވަނީ މިމަހުގެ ތިންވަނަ ދުވަހު" ޝާހީން ވިދާޅުވިއެވެ.
މުޖުތާޒް ފަހުމީ މިވަގުތު ހުންނެވީ ލ. ގަމު ކޮވިޑް ފެސިލިޓީގައި ކަމަށާއި އޭނާއަކީ ހައިރިސްކު ބޭފުޅެއް ކަމަށް ވެސް ޝާހީނު ވިދާޅުވިއެވެ.
ކުޑަފުށީގައި މުޖުތާޒް ހުންނެވީ ކަރަންޓީން ފުރިހަމަ ކުރުމަށް ކަމަށް މަޢުލޫމާތު ލިބެއެވެ.
މިހާރު ކޮވިޑް-19 ޖެހިފައިވާ 634 މީހަކު ރާއްޖޭގައި ތިބިއިރު މީގެ ތެރެއިން 38 މީހުންނަކީ އަތޮޅު ތެރޭގެ އެކި ރަށްރަށުން ކޮވިޑް-19 ޖެހިފައިވާ މީހުންނެވެ.
