އެންމެ ފަހުން ހެދި މަގުގައި ފެންބޮޑެއް ނުވޭ: ޝަމާއު
މި މަހު ހުޅުވި ކަނބާ އައިސާ ރަނި ހިނގުމުގައި ބޯކޮށް ވާރޭ ވެހުނު ނަމަވެސް ފެންބޮޑު ނުވާ ކަމަށް މާލެ ސިޓީގެ ޑެޕިއުޓީ މޭޔަރު ޝަމާއު ޝަރީފު މިއަދު ވިދާޅުވެއްޖެ އެވެ.
ޝަމާއު މިހެން ވިދާޅުވެފައި ވަނީ މިއަދު ކުރެއްވި ޓްވީޓެއްގައެވެ. އެ ޓްވީޓްގައި ޝަމާއު ވިދާޅުވީ ކަނބާ އައިސާ ރަނި ހިނގުން ތަރައްގީ ކޮށްފައިވަނީ "ސްޓްރީޓްސްކޭޕިން" ޕްރޮޖެކްޓުގެ ދަށުން ކަމަށެވެ. އަދި މި މަގުގެ އެއް ބައި ހުޅުވާފައި ވާއިރު، މިއަދު ބޯކޮށް ވާރޭ ވެހުނު ނަމަވެސް އެތަނުގައި ފެންބޮޑު ނުވާ ކަމަށެވެ.
ސިޓީ ކައުންސިލުގެ "ސްޓްރީޓްސްކޭޕިން" ޕްރޮޖެކްޓުގެ ދަށުން އެންމެ ފުރަތަމަ ތަރައްގީ ކުރަން ފެށި މަގަކީ ކަނބާ އައިސާ ރަނި ހިނގުމެވެ. މި މަގު ތަރައްގީ ކުރުމަށް ފަހު އަލުން ހުޅުވާލާފައިވަނީ މި މަހު ކުރީ ކޮޅުގައެވެ.
ރާއްޖޭގެ އެކި ސަރަހައްދުތަކަށް މިދުވަސްވަރު ވިއްސާރަ ކުރަމުން އަންނައިރު މާލޭގެ ބައެއް ސަރަހައްދުތަކުގައި ވެސް ފެން ބޮޑުވާއިރު އެމްއެންޑީއެފުން އަންނަނީ ހަރަކާތްތެރިވަމުންނެވެ. އެމްއެންޑީއެފުން ބުނެފައިވަނީ މާލެއަށް ބޯކޮށް ވާރޭވެހި އެސްޓީއޯ ފުށްގުދަން ހުންނަ ސަރަހައްދުގައި ފެން ބޮޑުވުމާ ގުޅިގެން އެމްއެންޑީއެފް ފަޔާ އެންޑް ރެސްކިއު ސާވިސްއިން ޕަމްޕް ބޭނުން ކޮށްގެން ފެން ހިންދުމުގެ މަސައްކަތް ކުރަމުން އަންނަ ކަމަށެވެ.
