ކައިވެނި އެކަންޏެއް ނޫން، މިހާރު ވަރި ކުރަނީ ވެސް ވީޑިއޯ ކޮންފަރެންސް މެދުވެރިކޮށް!
ކޮވިޑް-19 ގެ ސަބަބުން ގެނައި ސިއްޙީ ކުއްލި ނުރައްކަލުގެ ހާލަތާއި ގުޅިގެން، ކޯޓުތަކުގައި ނިންމަންޖެހޭ މައްސަލަތައް މިހާރު ކުރިއަށް ގެންދަނީ ކޯޓަށް ނުގެންގޮސް އެމީހަކު ތިބި ތަނެއްގައި ތިބެ، ވީޑިއޯ ކޮންފަރެންސް މެދުވެރިކޮށެވެ.
އެގޮތުން ވީޑިއޯ ކޮންފަރެންސް މެދުވެރިކޮށް ކައިވެނި ކުރެވޭގޮތަށް މިދިޔަމަހުގެ 3 ވަނަ ދުވަހު އާއިލާއާއިބެހޭ ކޯޓުން ނިންމާފައިވާއިރު، މިހާރު ވަރީގެ މައްސަލަތައް ވެސް ނިންމަނީ ވީޑިއޯ ކޮންފަރެންސް މެދުވެރިކޮށެވެ.
އެގޮތުން ދެމަފިރިން ބޭނުންވެގެން ވީޑިއޯ ކޮންފަރެންސް މެދުވެރިކޮށް ބޭއްވި ޝަރީއަތުގަައި ޤާޟީގެ ހުއްދައާއެކު ވަނީ ވަރިކޮށްފައިއެވެ.
މީގެ އިތުރުން ކޯޓުން ބޭރުގައި ކުރި ވަރިތައް ސާބިތު ކުރުން ވެސް ވީޑިއޯ ކޮންފަރެންސް މެދުވެރިކޮށް ކުރިއަށް ގެންގޮސްފައިވެއެވެ.
ކޮވިޑް-19 އާއި ގުޅިގެން ފެމިލީ ކޯޓުން ވީޑިއޯ ކޮންފަރެންސް މެދުވެރިކޮށް ޝަރީއަތްތައް ކުރިއަށް ގެންދިއުމަށް ނިންމި ފަހުން މިހާތަނަށް 15 މައްސަލައެއް ކުރިއަށް ގެންގޮސްފައިވެއެވެ. އޭގެ ތެރޭގައި ގެވެށި އަނިޔާގެ މައްސަލައާއި، ވަރި ސާބިތުކުރުމުގެ މައްސަލައަކާއި ވަރިވުމަށް އެދި ހުށައެޅި މައްސަލައަކާއި ވަރިކުރުމަށް ހުށައެޅި މައްސަލަތައް ހިމެނެ އެވެ.
