އެމްޕީއެލް އަދި އެސްޓީއޯގެ އެހީގައި އިމާރާތްކުރާ, ބިދޭސީންގެ އެކަމަޑޭޝަން ބްލޮކްތަކުގެ މަސައްކަތް ނިމެނީ
އެސްޓީއޯ އަދި އެމްޕީއެލް ގެ އެހީގައި ބިދޭސީންނަށް އިމާރާތް ކޮށްދޭ އެކަމަޑޭޝަން ބްލޮކްތަކުގެ މަސައްކަތް މިމަހުގެ 20 ވަނަ ދުވަހަށް ނިންމާލެވޭނެ ކަމަށް އެޗްޑީސީން ހާމަކޮށްފިއެވެ.
އެސްޓީއޯ ހިޔާ ކުއާޓަރ ގެ ނަމުގައި ހުޅުމާލޭ ދެވަނަ ފިޔަވަހީގައި 1292 މީހުންގެ ޖާގައިގެ ފެސިލިޓީއެއް ހަދަމުންދާއިރު، މިއީ 6 ބިލްޑިންގ ބްލޮކް އާއި 96 ފާޚާނާ ހިމެނޭ ގޮތަށް ހަދާ މިފެސިލިޓީ އެކެވެ. އަދި 310 މީހުންނަށް އެއްފަހަރާ ބޭނުންކުރެވޭނެ ކެންޓީނެއްވެސް އެތަނުގައި ހިމެނެއެވެ. މި ޕްރޮޖެކްޓްގެ %96 އަށްވުރެ ބޮޑު ބައެއް މިހާރު ނިންމާލެވިފައިވާ ކަމަށް އެޗްޑީސީން ހާމަކުރެއެވެ.
މީގެއިތުރުން އެމްޕީއެލުން 1292 މީހުންގެ އެކަމަޑޭޝަން ބްލޮކްތަކުގެވެސް 96 އިންސައްތަ މަސައްކަތް މިހާރު ނިމިފައިވާއިރު، މި މަސައްކަތުގެ ދަށުން ޕްރީފެބްރިކޭޓް 6 އެކަމަޑޭޝަން ބްލޮކާއި، 96 ފާޚާނައާއި 310 މީހުންނަށް އެއްފަހަރާ ބޭނުންކުރެވޭ ކެންޓީނެއް ވެސް ދަނީ ހަދަމުންނެވެ.
