އިދިކޮޅުން ޕީޖީއަށް: މެންބަރު ޝިޔާމަށް އަނިޔާކުރި މައްސަލަ އިންސާފުވެރިކަމާއެކު ތަހުގީގުކޮށްދެއްވާ، ގާތުން ބަލާ ދެއްވާ!
މިމަހުގެ ދެވަނަ ދުވަހުގެ މެންދަމު ރައްޔިތުންގެ މަޖިލީހުގައި ބޭއްވި ޖަލްސާގައި ނައިފަރު ދާއިރާގެ އިއްޒަތްތެރި މެންބަރު އަދި ޕީޕީއެމްގެ ނައިބު ރައީސް އަޙުމަދު ޝިޔާމް އަށް އަނިޔާކޮށް މާރާމާރީ ހިންގި މައްސަލަ، އިންސާފުވެރިކަމާއެކު ތަހުގީގު ކޮށްދެއްވާނެ ކަމުގެ ޔަގީންކަން ދެއްވުމަށާއި އެމައްސަލަ ގާތުން ބައްލަވާ ދެއްވުމަށް އިދިކޮޅު ޕީޕީއެމް/ޕީއެންސީ ކޯލިޝަނުން ޕްރޮސެކިއުޓާ ޖެނެރަލް ޙުސެއިން ޝަމީމް އަރިހުން އެދިލައްވައިފިއެވެ.
އެގޮތުން އެކޯލިޝަންގެ ފަރާތުން ޕީޖީ ޝަމީމް އަށް ފޮނުއްވި ސިޓީއެއްގައި ވިދާޅުވެފައިވަނީ އެރޭ މަޖިލީހުގެ ޤަވާއިދާ ޚިލާފުވެ އެމަޖިލިސްގެ ރައީސް މުޙައްމަދު ނަޝީދުގެ އެންގެވުމަށް، އެމްޑީޕީ އަށް ނިސްބަތްވާ ބައެއް މެންބަރުން އެމްޕީ ޝިޔާމަށް އަނިޔާކުރި މައްސަލަ ފުލުހުންނަށް ހުށަހަޅާފައިވާނެ ކަމަށާއި އެމައްސަލައިގެ ޖިނާއީ ތަހުގީގު ފަށްޓަވާފައިވާ ކަމަށް ފުލުހުންގެ ފަރާތުން ވެސް ހިއްސާ ކޮށްފައިވާ ކަމަށެވެ.
އެހެންކަމުން ފުލުހުންގެ އެތަހުގީގަކީ ނުފޫޒުތަކުން އެއްކިބާ ވެފައިވާ މިނިވަން އިންސާފުވެރި ތަހުގީގެއްކަން ކަށަވަރު ކުރުމުގެ ގޮތުން އެތަހުގީގުގެ ކަންތައްތައް ކުރިއަށްދާ ގޮތް ވީހާވެސް ގާތުން ބައްލަވާ ދެއްވުމަށް އެކޯލިޝަނުން އެދިފައިވެއެވެ.
