ކޮންމެ ސަލާމަކަށް އެމްސީ ހުށަހެޅުމާ މަހުލޫފް ދެކޮޅު
މުވައްޒަފުން ބަލިވެގެން ސަލާމް ބުނާނަމަ، މެޑިކަލް ސެޓްފިކެޓް ހުށަހަޅަން އޮންނަ އުސޫލު ބަދަލުކުރުމަަށް، ވަޒީފާއާ ބެހޭ ގާނޫނަށް ހުށަހަޅާފައިވާ އިސްލާހާ ދެކޮޅު ކަން ޔޫތު މިނިސްޓަރު އަހުމަދު މަހުލޫފް ހާމަކުރައްވައިފިއެވެ.
މިކަމާއި ގުޅިގެން މަހުލޫފް ކުރައްވާފައިވާ ޓްވީޓެއްގައި ވިދާޅުވީ ސިވިލް ސާވިސް މުވައްޒަފުންނަކީ ކުޑަ އުޖޫރަ އަކަށް ބޮޑު މަސައްކަތްތަކެއް ބައެއް ކަމަށާއި މިނިސްޓްރީ އޮފް ޔޫތް ގެ 99 އިންސައްތަ މުވައްޒަފުންނަކީ ވަރަށް ރަނގަޅަށް މަސައްކަތް ކޮށްދެއްވާ ބައެއް ކަމަށެވެ.
އަދި ބައެއް މުވައްޒަފުންގެ އަމަލުތަކުގެ ސަބަބުން އެހެން ހުރިހާ މުވައްޒަފުންނަށް މިކަން ތަކުލީފަކަށް ވުން ގާތް ކަމަށް ފާހަގަކޮށް މަހު.ލޫފް ވަނީ މި ބިލް ފާސްކުރުމުގެ ކުރިން މިކަމާމެދު ރަނގަޅަށް ވިސްނާލުމަކީ މުހިންމެ ކަމެއްގެ ގޮތުގައި ފާޙަގަކޮށްފައެވެ.
Civil Service muahzafunnakee kuda ujooraehga bura masahkaiythakeh kohdhevvaa baeh.@MoYSCEmv ge 99% muahzzafun varah rangalhah masahkaiy kohdhevvaa.
Baeh muahzafunge amaluthakun ehen hurihaa muahzafunnah mikan thakuleefakahvun gaaiy.Bill faaskurumuge kurin visnaalan muhimmu kameh. pic.twitter.com/KvngIZwrIz— Ahmed Mahloof (@AhmedMahloof) June 8, 2020
މިހާރު ގާނޫނުގައި ބުނެފައި ވަނީ މުވައްޒަފަކު ހިދުމަތްކުރާ ކޮންމެ އަހަރަކު، ސަލާމުގެ ޗުއްޓީގެ ގޮތުގައި މުސާރަ ލިބޭގޮތަށް، ދިނުމަށް ވަޒީފާދޭ ފަރާތުގެ މައްޗަށް ލާޒިމުވެގެންވަނީ ގިނަވެގެން 30 ދުވަހުގެ ޗުއްޓީއެއް ކަމަށެވެ.
އަދި ބަލީގެ ބާވަތާއި އެބަލީގެ ސަބަބުން މުވައްޒަފަކަށް މަސައްކަތަށް ނުނިކުމެވޭނެ މުއްދަތު ބަޔާންކޮށް، ރަޖިސްޓަރީ ކޮށްފައިވާ ސިއްހީ މަސައްކަތްތެރިޔަކު ދޫކުރާ މެޑިކަލް ސެޓުފިކެޓެއް ވަޒީފާއަށް ނުކުންނަ ދުވަހު ހުށަހެޅުމުންނޫނީ، އެމުވައްޒަފަކަށް، ވިދިވިދިގެން ދެ ދުވަހަށްވުރެ ދިގު މުއްދަތަކަށް ސަލާމުގެ ޗުއްޓީ ދިނުން، ވަޒީފާދޭ ފަރާތުގެ މައްޗަށް ލާޒިމެއް ނޫނެވެ.
ނަމަވެސް މިހާރު ހުށަހަޅާފައި ވަނީ އެންމެ ދުވަހަކު ސަލާމް ބުނި ނަމަވެސް މެޑިކަލް ސެޓްފިކެޓް ހުށަހަޅަން ޖެހޭ ގޮތަށް އެ މާއްދާ ބަދަލު ކުރުމަށެވެ.
ގާނޫނަށް ހުށަހަޅާފައިވާ އިސްލާހާ ގުޅިގެން ގިނަ އަދަދެއްގެ ބަޔަކު ވަނީ އޭރުވެސް ނުރުހުން ފާޅުކޮށްފައެވެ. އަދި މިއީ ވަޒީފާ އަދާކުރާ ފަރާތްތަކަށް ދެވޭ ވަރަށް ބޮޑު ތަކުލީފެެއް ކަމަށާއި ހާއްސަކޮށް ޕީރިއަޑް ވެގެން ގަދަޔަށް ބަނޑުގައި ރިއްސާތީ ސަލާމް ބުނަން މަޖުބޫރުވާ އަންހެނުންނާއި، ނަފްސާނީ ބަލިތައް ތަހައްމަލު ކުރާ ފަރާތްތަކަށް މިކަމުން އުނދަގޫ ވާނެކަން ގިނަ ބަޔަކު ވަނީ ފާހަގަކޮށްފައެވެ.
