7،000 ފްލެޓު ހުރިއިރު، ލިބޭނެކަަމަށް ބުނެ 11،000 މީހުންނަށް ލިޔުން ދީފައިވޭ: ހައުސިންގ
ކުރީގެ ރައީސް އަބްދުﷲ ޔާމީން އަބްދުލްޤައްޔޫމްގެ ވެރިކަމުގައި ހުޅުމާލޭ ދެވަނަ ފިޔަވަހީގައި 7،000 ފްލެޓު ގާއިމް ކޮށްފައިވާއިރު، އެފްލެޓުތައް ލިބޭނެކަމަށް ބުނެ 11،000 މީހުންނަށް ލިޔުން ދީފައިވާ ކަމަށް ހައުސިންގ މިނިސްޓްރީން ބުނެފިއެވެ.
"ހިޔާ" މަޝްރޫޢުގެ ދަށުން އަޅާފައިވާ މިފްލެޓުތައް ހަވާލު ކުރުން ފަސްވެފައިވާތީ ގިނަ ބަޔަކު އަންނަނީ މިސަރުކާރަށް ފާޑު ކިޔަމުންނެވެ.
އެފްލެޓުތައް ހަވާލުކުރުން އަންނަ ޖުލައި މަހު ފަހުކޮޅު ފެށޭނެ ކަމަށް ހައުސިންގ މިނިސްޓަރ އައިމިނަތު އާތިފާ ވަނީ މީގެކުރިން ވިދާޅުވެފައެވެ. ނަމަވެސް އެއީ "އޮޅުމަކުން" ވިދާޅުވެވުނު އެއްޗެއް ކަމަށް ފަހުން މިނިސްޓަރ ވަނީ ވިދާޅުވެފައެވެ. އެކަމުގެ ސަބަބުން ވެސް ސަރުކާރަށް ވަރަށް ބޮޑަށް ވަނީ ފާޑުކިޔުން އަމާޒުވެފައެވެ.
ހައުސިންގ މިނިސްޓްރީގެ ޑެޕިއުޓީ މިނިސްޓަރ އަލީ ޝާމިން ވިދާޅުވީ ހިޔާ މަޝްރޫއުގެ ފްލެޓުތަކުގެ އަގު ވަރަށް ބޮޑު ކަމަށާއި 550 އަކަފޫޓުގެ ދެ ކޮޓަރީގެ އެޕާޓްމަންޓަކަށް 82398 އެމެރިކާ ޑޮލަރު ޚަރަދު ކޮށްފައިވާ ކަމަށެވެ. އެހެންކަމުން އަކަފޫޓަކަށް 2300 ރުފިޔާވާއިރު އެޚަރަދު ކޮށްފައިވަނީ ފިނިޝިން މަސައްކަތްވެސް ނުހިމަނާ ކަމަށް އޭނާ ވިދާޅުވިއެވެ. އަދި ފްލެޓުތައް ހަވާލުކުރުން ލަސްވަނީ ފިނިން މަސައްކަތްތައް ނިންމުމަށް ކަމަށް ވެސް ވިދާޅުވެފައިވެއެވެ.
