މަޖިލީހުގައި ހިނގި ގްރޫޕް މާރާމާރީ ހަރުކަށި އިބާރާތުން ކުށްވެރިކޮށް، ހާމަކަން ބޮޑު ގޮތެއްގައި ތަހުގީގު ކުރަން ގޮވާލަން: އީސީއާރް
އިސްލާޙާއި ޑިމޮކްރަސީއަށް މަސައްކަތްކުރާ، ޔޫރަޕް ބައްރާއި ހުޅަނގުގެ ގިނަ ޤައުމުތަކަށް ނިސްބަތްވާ އެންމެ ފުޅާ ސިޔާސީ އިއްތިހާދު ކަމުގައިވާ ޔޫރަޕިއަން ކޮންޒަވޭޓިވްސް އެންޑް ރިފޯމިސްޓް (އީސީއާރް) ޕާޓީން ރާއްޖޭގެ ރައަޔިތުންގެ މަޖިލީހުގައި މިމަހުގެ ދެވަނަ ދުވަހު ހިންގި "ގްރޫޕް މާރާމާރީ" ހަރުކަށި އިބާރާތުން ކުށްވެރިކޮށްފިއެވެ.
އެޖަލްސާގައި ނައިފަރު ދާއިރާގެ މެންބަރު އަޙްމަދު ޝިޔާމް އަށް ލިބުނު އަނިޔާތަކާއިމެދު ކަންބޮޑުވުން ފާޅުކުރާ ކަމަށް ބުނެ އީސީއާރް އިން މިއަދު ނެރުނު ނޫސްބަޔާނެއްގައި ބުނެފައިވަނީ މަޖިލީހުގައި އިދިކޮޅު ކޯލިޝަން ތަމްސީލުކުރާ މަދު މެންބަރުންނަށް އެބޭފުޅުންގެ ޤާނޫނީ ޒިންމާ އަދާ ކުރަން ހުރަސް އެޅުމަކީ ހިތާމަހުރި ކަމެއް ކަމަށެވެ.
މީގެއިތުރުން އެއީ ރާއްޖޭގައި ޑިމޮކްރެސީ އަށަގެންނެވުމަށާއި ދައުލަތުގެ ނިޒާމުތައް އިސްލާޙުކޮށް ހަރުދަނާ ކުރެވެމުންދިޔަ މަސައްކަތްތަކަށް ހީނަރުކަން އަންނާނެ ކަމެއް ކަމުގައިވެސް އީސީއާރްގެ ބަޔާނުގައި ފާހަގަ ކޮށްފައިވެއެވެ.
އިދިކޮޅު ޕްރޮގްރެސިވް ކޯލިޝަނުން މިއަދުގެ ޖަލްސާ ބޯއީކޮޓް ކޮށްފައިވަނީ ހިނގާދިޔަ ޣައިރު ޤާނޫނީ އަމަލުތަކާއިމެދު ނުރުހުން ފާޅުކޮށް، އެކަން މިނިވަންކަމާއެކު ތަހުގީގުކޮށް މެންބަރު ޝިޔާމަށް އިންސާފު ހޯދައި ދިނުމަށް ކަމަށް ވެސް އެބަޔާނުގައިވެއެވެ.
