އިންޑިއާއިން ދިން މެލޭރިއާ ބޭހުން ކޮވިޑަށް ފަރުވާ ނުލިބުނަސް އެހެން ބަލިތަކަށް ފަރުވާ ލިބޭ!

ކޮވިޑް-19 އިން ރައްކާތެރިވުމަށް އިންޑިއާއިން ދިން މެލޭރިއާ ބައްޔަށް ޚާއްސަ ބޭހެއް ކަމުގައިވާ ހައިޑްރޮކްސީ ކްލޯރޯކުއިން ބޭހުން ކޮވިޑަށް ފަރުވާއެއް ނުލިބުން ކަމުގައިވިޔަސް، އެއީ އެހެން ބަލިތަކަށް ރަނގަޅު ބޭހެއް ކަމަށް މޯލްޑިވިއަން މެޑިކަލް އެސޯސިއޭޝަންގެ ނައިބު ރައީސް އަދި އެތެރެހަށީގެ ޚާއްސަ ޑޮކްޓަރ ޑރ.މުޙައްމަދު އަލީ ވިދާޅުވެއްޖެއެވެ.

Ads by STELCO

ޑރ. މުޙައްމަދު އަލީ މިއަދު ފޭސްބުކްގައި ކުރި ޕޯސްޓެއްގައި، އެބޭހުގެ ފޮޓޯއެއް ވެސް ހިއްސާ ކުރައްވަމުން ވިދާޅުވީ ހައިޑްރޮކްސީ ކްލޯރޯކުއިން ބޭހަކީ ކޮވިޑް19 އަށް ބޭނުންކުރަން ފެށުމުގެކުރިންވެސް ވަރަށްގިނަ ބަލިތަކަށް ފަރުވާ ދިނުމަށްޓަކާ ބޭނުންކުރާބޭހެއް ކަމަށެވެ.

އެގޮތުން އެބޭސް ރާއްޖެބައްޔަށް ފަރުވާދިނުމަށްބޭނުން ކުރެވޭ ކަމަށާއި ފުއްޕާމޭގެ ބައެއްބައްޔަށް ފަރުވާދިނުމަށް ބޭނުން ކުރެވުމުގެ އިތުރުން ބައެއް އޮޓޯއިމިއުން ބަލިތަކަށްވެސް ފަރުވާ ކުރުމަށް ބޭނުން ކުރެވޭ (މިސާލަކަށް ސިސްޓެމިކް ލޫޕުސް އެރިތިމަޓޯސިސް، ކިޑްނީގެ ލޫޕުސް) ކަމަށް ޑރ. މުޙައްމަދު އަލީ ވިދާޅުވިއެވެ.

އެހެންކަމުން ކޯވިޑް19 އާއި ގުޅިގެން އަންނަ ބައެއް ލިޔުންތަކުގަ އެބޭސް ރަނގަޅު ނޫންކަމަށް ފެނުނު ކަމުގައި ވިޔަސް، ދެން މިބޭސް އެހެން ބަލިތަކަށްބޭނުން ކުރާ ބަލިމީހުން ބޭސް ހުއްޓައި ނުލެއްވުމަށް ޑޮކްޓަރ އިރުޝާދު ދެއްވާފައިވެއެވެ.

"މިއީ އެބަލިތަކަށް ވަރަން މުހިންމު ބޭހެއް، ހުޓާލައްވައިފި ނަމަ ބަލި އިތުރަށް ގޯސްވެދާނެ." ޑރ. މުޙައްމަދު އަލީ ވިދާޅުވިއެވެ.