ޗައިނާއިން ދައްކަން ޖެހޭ ލޯނުތައް ސަސްޕެންޑުކުރި ގައުމުތަކުގެ ތެރޭގައި ރާއްޖެ!
ޗައިނާ އަށް ދައްކަންޖެހޭ ދަރަނި ސަސްޕެންޑުކުރި ގައުމުތަކުގެ ތެރޭގައި ރާއްޖެ ހިމެނޭ ކަމަށް، ފޮރިން މިނިސްޓަރު އަބްދުﷲ ޝާހިދު މިރޭ ވިދާޅުވެއްޖެ އެވެ.
ރާއްްޖޭގައި ހުންނަވާ ޗައިނާ ސަފީރު ޖަންގް ލޮޖޮންގާއެކު ބޭއްވެވި ބައްދަލުކުރެއްވުމަކަށް ފަހު ޝާހިދު ކުރެއްވި ޓްވީޓެއްގައި ވިދާޅުވީ ކުޑަކޮށް ތަރައްގީވެފައިވާ ގައުމުތަކަށް އެހީވާން ޖީ20 އިން ފަށާފައިވާ، ލޯނުތައް ސަސްޕެންޑުކުރުމުގެ މަސައްކަތުގައި ޗައިނާ އިން، ލުއި ދޭ 77 ގައުމުގެ ތެރޭގައި ރާއްޖެ ހިމެނޭ ކަމަށް ޗައިނާ ސަފީރު ވިދާޅުވި ކަމަށެވެ.
ލޯނުތައް ދެއްކުން ސަސްޕެންޑްކުރުމާ ބެހޭ ގޮތުން އަދި ތަފްސީލްތައް ހާމައެއް ނުކުރެ އެވެ.
މީގެއިތުރުން މި ބައްދަލުވުމުގައި ވަނީ ކޮވިޑް އާއި ދެކޮޅަށް ރާއްޖެއިން ކުރަމުންދާ މަސައްކަތަށް އެހީވުމުގެ ގޮތުން ޗައިނާގެ ކުންފުންޏެއް މެދުވެރިކޮށް ރާއްޖޭގައި މެޑިކަލް ލެބޯޓްރީއެއް ގާއިމުކުރުމާ ގުޅޭ ގޮތުން ވެސް މަޝްވަރާކޮށްފައެވެ.
ކޮވިޑް އާއި ދެކޮޅަށް ރާއްޖެއިން ކުރާ މަސައްކަތަށް އެހީީވުމުގެ ގޮތުން ޗައިނާގެ ސަރުކާރާއި އެގައުމުގެ ބައެއް ކުންފުނިތަކުން ވަނީ ރާއްޖެއަށް ސިއްހީ ގިނަ ސާމާނުތަކެއް ހަދިޔާކޮށްފައެވެ. އޭގެތެރޭގައި ވެންޓިލޭޓަރާއި، މާސްކު ފަދަ ތަކެތި ހިމެނެއެވެ.
